Уопсастыба

Иван Григорьевич Аҕа дойду Улуу сэриитин кыттыылааҕа, үлэ уонна сэрии бэтэрээнэ. Аҕыйах кэмҥэ Чырыыда күөл үрдүгэр кэрэ айылҕалаах кырдалга турар "Олох саҥардар" холкуоска бэрэссэдээтэлинэн, онтон биригэдьииринэн үлэлээбит. Үлэҕэ-хамнаска сүрэхтээх, сытыары сымнаҕас майгылаах, дьон-сэргэ убаастыыр киһитэ үһү. Сопхуос үлэтигэр элбэх сыратын биэрбит. 1985 сыллаахха өлбүт.

Хос эбэм Сметанина Александра Михайловна  биэс оҕоҕо күн сирин көрдөрөн, эһэбинээн үтүөкэн дьону иитэн таһаарбыттара.

Улахан кыыстара Анастасия Ивановна -- мин эбэм. Кини 1934 с. төрөөбүт. Кыра эрдэҕиттэн көрдөөх-нардаах, туох эмэ дьээбэни саҥаран, дэлби күллэрэрэ үһү. Оттуу сылдьан, дьүөгэлэрин кытта уолаттары дьээбэлээн, сахалыы частушка айаллара үһү. Эдэриттэн холкуос-сопхуос үлэтигэр эриллибит. Үрэх баһыгар пиэрмэҕэ үлэлээн, тоҥор-хатар, аччыктыыр диэни этинэн-хаанынан билбит. Ыллыырын сөбүлүүрэ, кэнсиэргэ сололыыра үһү. Үлэ уонна тыыл бэтэрээнэ.

Иккис кыыстара Захарова Аксиния Ивановна 1938 с. күн сирин көрбүтэ. 1958 с. Иркутскайга Хо-Ши-Мин аатынан омук тылын педагогическай институтун бүтэрбит. Бастаан Сиинэҕэ, онтон үөрэммит оскуолатыгар Кэбээйигэ 2008 с. диэри үлэлээбитэ. Кини үөрэппит оҕолоро бары үрдүк үөрэхтээх үлэһиттэр. Олор истэригэр бааллар: юристар, бэлиитиктэр, учуонайдар, быраастар, учууталлар, биэлсэрдэр. Аксинья Ивановна үтүө суобастаах үлэтэ үгүс наҕарааданан бэлиэтэммитэ: "Үлэҕэ килбиэнин иһин”, “В.И.Ленин төрөөбүтэ 100 сыла" мэтээллэринэн, "Социалистическай күрэх кыайыылааҕа", "Учууталлар учууталлара", "Үөрэхтээһин систиэмэтин бочуоттаах бэтэрээнэ" бэлиэлэринэн. Саха АССР оскуолаларын үтүөлээх учуутала, Кэбээйи улууһун Бочуоттаах гражданина.

Үһүс кыыстара Анна Ивановна  1946 с. төрөөбүтэ. Анна оҕо эрдэҕиттэн холку, дьоҥҥо сыһыана сымнаҕас, эйэҕэс эбит. Бүлүүтээҕи педучилищеҕа үөрэнэн, алын сүһүөх кылаас учууталын идэтин ылан, Аллайыаха оройуонугар, онтон төрөөбүт дойдутун оскуолатыгар 1996 с. диэри үлэлээбит. РФ норуотун үөрэҕириитин туйгуна, үлэ бэтэрээнэ, Кэбээйи улууһун Бочуоттаах гражданина.

Төрдүс оҕо Петр Иванович 1950 с. күн сирин көрбүт. Оччотооҕу оҕолор сиэрдэринэн, кини эмиэ үлэҕэ-хамнаска эриллэн улааппыт. Оскуола кэнниттэн сопхуоска үлэлээн баран, аармыйаҕа сулууспалаабыт. Ол кэнниттэн Томскайдааҕы мэдиссиинискэй институту 1977 с. бүтэрэн баран, Дьокуускайга куораттааҕы балыыһаҕа хирурдаабыт. Онтон икки сыл Москваҕа сүрэх-тымыр хирургиятыгар ординатураҕа үөрэммит. Саха сиригэр аан бастакынан тымырга эпэрээссийэлэри оҥортообута. Мэдиссиинэ национальнай киинэ  аһыллыбытыгар, ити салааҕа отделение сэбиэдиссэйинэн анаммыта. 1998 с. кандитатскай диссертациятын көмүскээбитэ. Петр Иванович Саха Өрөспүүбүлүкэтигэр маҥнайгы кардиохирург буолар. Аһаҕас сүрэххэ, улахан дьоҥҥо да, оҕолорго да эпэрээссийэ бөҕөтүн оҥорон, элбэх дьон олоҕун быыһаан, кинилэр истиҥ махталларын ылар. Кини СӨ Бочуоттаах гражданина, "За воинскую доблесть", "Лучшие люди России" мэтээллэрдээх, "Барҕарыы" пуонда стипендиата,  СӨ Доруобуйатын харыстабылын туйгуна, СӨ Судаарыстыбаннай бириэмийэтин лауреата. "Арассыыйа  үтүөлээх бырааһа" үрдүк аат бэлиэтин 2012 сыллаахха Д.И.Медведев илиититтэн туппута, харда тылы эппитэ. 2014 сылтан мэдиссиинискэй наука дуоктара.

Кыра уоллара Иван Иванович кыра эрдэҕиттэн кип-киэҥ харахтаах, сытыы- хотуу уол эбит. СГУ историческай факультетын бүтэрэн, идэтинэн оскуолаҕа, училищеҕа үлэлээбитэ. Историк-этнограф быһыытынан кандидатскай диссертациятын көмүскээбитэ. Элбэх ыстатыйалардаах, хоһооннордоох, "Кэбээйи сахалара", " Кобяйский улус" диэн кинигэлэрдээх. Билигин бочуоттаах сынньалаҥҥа олорор.

   Аахпыккыт курдук, хос эһэлээх эбэм өрөспүүбүлүкэҕэ туһалаах дьону иитэн таһаарбыттар. Хос эһэм куобахтыыр, кустуур, хас бардаҕын аайы бултаах-алтаах кэлэн, дьонун сэргэтин аһатар үһү. Кини дьиэ кэргэнигэр дурда-хахха, үтүө сүбэһит, холобур буолан, оҕолоро-сиэннэрэ үлэни өрө туппут дьон, төрөөбүт өрөспүүбүлүкэбитигэр үгүс үтүөнү оҥоро сылдьаллар.

Винокуров Павел, 

 Кэбээйи.