Иван Шамаев, Саха Кэнгириэһин бэрэссэдээтэлэ: «Ил Түмэн 70» уопсастыбаннай хамсааһынынан Афанасий Павловичтыын Майаҕа сырыттыбыт, биир бөлөх Чурапчыга, биир бөлөх Бэрдьигэстээххэ үлэлээтэ. Бастатан туран, дьон Ил Түмэн суолтатын түһэрэн өйдүүрүнэн нэһилиэнньэҕэ Ил Түмэн наадатын өйдөтөбүт. Иккиһинэн, Ил Түмэни суолтатын, оруолун биһиги мөлтөтүө, ахсаанын да аҕыйаттарыа суохтаахпыт, ону быыбардааччылар өйдүүллэрин ситиһэ сатыыбыт. Үсүһүнэн, 70 дьокутаат оннунан хааллын диэн илии баттааһыны хомуйарбыт наадалаах. Онтон салгыы Ил Түмэни тупсарарга үлэлиэхпит. Хайдах киһи депутат буолуохтааҕын быыбардааччы ситэ өйдөөбөт. Нэһилиэнньэ Ил Түмэн хаачыстыбата үчүгэй буоларыгар эмиэ эппиэтинэстээх, быыбарга хайаан да кыттыахтаах, хайдах киһи депутат буолуохтааҕын өйдүөхтээх, быһаарсыахтаах, бэйэтэ өйдөөх-санаалаах, толкуйдаах буолуохтаах, быыбар чиэһинэйдик ааһарын хонтуруоллаһыахтаах».
Афанасий Алексеев, уопсастыбаннай хамсааһын кыттыылааҕа:
«Дьокутааттар ахсааннарын оннунан хаалларарга диэн сыаллаах нэһилиэнньэни кытта көрсө сылдьабыт. 35 баартыйаттан 70 дьокутаат баар. «Биир ньыгыл» баартыйа 12 баартыйаттан уонна 36 биир мандаатынан барыта 48 дьокутаакка сокуон бырайыагын киллэрдэ. Тус бэйэм көрөрбүнэн дьокутаат ахсаана аччаатаҕына, хоту 4-5 улуус биир дьокутааттаах буолан хаалар. Биир дьокутаат 4 улууһу көмүскүүрэ уустук үлэ буолар, ол иһин нэһилиэнньэтиттэн тутулуга суох хас биирдии улуус туспа биирдии дьокутааттаах буолуон баҕарабын. Дьокутаат статуһа, кини оруола, суолтата түспүтэ кистэл буолбатах. Норуоттан тэйэн хаалбыттара, көмөтө суохтара, тугунан дьарыктаналлара биллибэтэ баар суол. Ол иһин манна ис сүрэхтэриттэн үлэлиир дьон кэлиэхтээхтэр. Хамнастаах дьокутаат тутулуктаах буолан хаалар, норуотугар үчүгэйи оҥорбото биллэр, онон уопсастыбанньыктар, чахчы үлэлиир дьон дьокутаат буолаллара, үлэлээбэт дьокутааты төттөрү ыҥыран атыны туруорар эмиэ сөп. Оттон Амма өрүс көмүскэлигэр Саха сирин олохтоохторо бары кыттыһаннар, бу боппуруоһунан Арассыыйа Бэрэсидьиэнигэр тиийэ сурук баран бэйэбит этиибитин тириэрдибиппит. Мас кэрдээччи билигин дуогабарын көтүрэргэ үлэлэһэ сылдьар. Онуоха Анна Шишигина салайааччылаах улуус уопсастыбаннаһа, атын да улуустар күүскэ үлэлээтилэр. Бары бииргэ буоламмыт норуот бэрэстэбиитэллэрэ дьокутааттар дьоҥҥо-сэргэҕэ чугаһыылларын уонна ахсааннара аччаабатын туһугар үлэлэһиэххэйиҥ диэн ыҥырабын».
Алтана Артемьева, “Амма олоҕо” хаһыат
http://xn--80aaaambpp4b1d.xn--p1ai/article/7788
-
0
-
0
-
0
-
0
-
0
-
0
