Муус устар 27 күнэ Саха сирин устуоруйатыгар ураты суолталаах бэлиэ күн. Быйыл Саха АССР тэриллибитэ 99 уонна Саха Өрөспүүбүлүкэтин Төрүт Сокуона ылыллыбыта 29 сыллара бэлиэтэнэр.
1922 с. муус устар 27 кунугэр Бүтүн Россиятааҕы Киин ситэриилээх кэмитиэт Президиума “Саха Автономнай Сэбиэскэй Социалистическай Республикатын туһунан” Декрети ылыныыта оччотооҕу көлүөнэ саха эдэр политиктарын – Платон Ойуунускай, Максим Аммосов, Исидор Барахов, Степан Аржаков -- сыралаах, утумнаах үлэлэрин үтүө түмүгэ этэ. Бу саха омугар улахан ситиһии, саҥа сайдыыга дьоһун хардыы буолбута. Онтон 1992 сыл муус устар 27 күнүгэр Саха Өрөспүүбүлүкэтин 12-с ыҥырыылаах Үрдүкү Сэбиэтин уурааҕынан Саха Өрөспүүбүлүкэтин саҥа Төрүт Сокуона (Конституцията) ылыллыбыта.
Саха сиригэр элбэх омук түмсэн, сомоҕолоһон үлэлээн, дойдубут кэлэр кэскилин түстүүр. Үйэ кэриҥэ кэм устата Саха Өрөспүүбүлүкэтэ балысханнык сайынна. Ыччаттарбыт үөрэҕи, билиини баһылаан, олох араас хайысхатыгар үгүс ситиһиилэрэ биһигини үөрдэр. Эдэр ыччат, автономияны олохтообут чулуу дьоннорбут ааттарынан куруутун киэн туттуҥ!
Чөл өйдөөх-санаалаах, сатабыллаах уонна дьоллоох буолуҥ! Сахабыт сирэ чэчирии сайдарын туһугар бары биир санаанан сомоҕо буолуоҕуҥ!
Уруй - Айхал !
Уруй - Туску !
Саргыбыт салалыннын!
Ытыктабылы кытта, Ил Түмэн дьокутаата Руслан Еремеевич Федотов
- 0
- 0
- 0
- 0
- 0
- 0