Дойду үрдүнэн ханнык үлэлэр ыытыллалларый? Тустаах уорганнарынан былааннаммыт бэрэбиэркэлэр тохтотуллаллар, чэпчэтиилээх кирэдьииттээһини көрөллөр, эбийиэктэр арендаларын төлөбүрдэрин, ону кытта нолуок, усунуос, кирэдьиит төлөбүрдэрин болдьоҕун уһаталлар.
Аччыгый уонна орто бизнеһы өйүүр ханнык миэрэлэри көрдүлэр? Улаханнык эмсэҕэлээбит тэрилтэлэргэ хамнас төлөбүрүгэр судаарыстыбаттан грант бэриллиэн сөп, алта ыйга нолуок уонна страховой усунуос төлөбүрэ тохтотуллаллар, алта ыйга хамнас төлөбүрүгэр бырыһыана суох кирэдьиит бэриллиэн, аренда төлөбүрүн болдьоҕо онуоха-маныаха диэри тохтотуллуон сөп, иэһи уонна ыстараабы төнүннэриигэ мораторий биллэриллэр, судаарыстыбаннай хантараакка кыттыһарга ирдэбил быраабылата чэпчэтиллибит, чэпчэтиилээх кирэдьииттээһин бырагыраамата оҥоһулубут. Бу көмө миэрэлэрэ уустук балаһыанньаҕа түбэспит аччыгый, орто бизнестээх предпринимателлэргэ уонна коммерческайа суох уопсастыбаннай тэрилтэлэргэ сыһыаннаах.
Ил Дархан Айсен Николаев кулун тутар 24 күнүгэр өрөспүүбүлүкэ аччыгый уонна орто предпринимательствотын өйүүр миэрэлэри олоххо киллэрэр ыйаахха илии баттаабыта. Өрөспүүбүлүкэ судаарыстыбаннай бүддьүөтүттэн 1,4 млрд солк. аччыгый бизнеһы өйүүр миэрэлэргэ ыытыллыбыт. Онтон 1 млдр солк. – нолуокка чэпчэтиигэ, 400 мөл. солк. – субсидияларга уонна кыра кирдьииттэргэ. Өрөспүүбүлүкэ предпринимательствотын миниистирэ Ирина Высоких Координационнай сэбиэт видео-сибээһинэн мунньаҕар иһитиннэрбитинэн, нолуокка чэпчэтии көрүллүбүт, аренда төлөбүрүн болдьоҕо уһатыллыбыт, былааннаммыт уонна былааннамматах бэрэбиэркэлээһин тохтотуллубут, ону таһынан СӨ предпринимательствотын сайыннарыы пуондата аччыгый уонна орто бизнес субъектарыгар 3% кирэдьиит көрбүт.
Биһиги Ил Түмэн инфраструктура сайдыытыгар, туризмҥа уонна предпринимательствоҕа сис кэмитиэтин чилиэнэ, норуот дьокутаата Руслан Федотовтан бу боппуруоска санаатын ыйыттыбыт:
- Коронавирус пандемията онтуката да суох уустук туруктаах өрөспүүбүлүкэбит бүддьүөтүгэр охсуу оҥордо. 100-кэ үлэһиттээх предпринимателлэр ордук эмсэҕилииллэр дии саныыбын. Үлэһиттэригэр хамнас төлүөхтэрин наада. Кириисиһи утары миэрэ олох уустук балаһыанньаҕа түбэспит предпринимателлэргэ көмө буолар. Билиҥҥитэ бу эйгэҕэ үлэлии сылдьар дьон биллэр-көстөр өйөбүлү билэ иликтэр. Сыыйа-баайа көмө оҥоһуллуоҕа. Мин санаабар, аччыгый уонна орто бизнес олох эстибэтин туһугар, кинилэр үлэлииллэрин көҥүллүөххэ наада. Мантан антах үлэлээбэтэхтэринэ, моҥкуруукка барар кутталлаахтар.
-
0
-
0
-
0
-
0
-
0
-
0
