Кыайыы күнүн иннинэ, ыам ыйын 8 күнүгэр сарсыарда 11 чаастан улуус дьаһалтатын дьиэтигэр Кыһыл Знамяны туруоруу буолуоҕа, ол онлайн көрдөрүллүөҕэ. Бу күн Чурапчы олохтоохторо уонна ыалдьыттара Кыайыы скверигэр Албан аат Аллеятын үөрүүлээх быһыыга-майгыга аһыыга, “Өлбөт үйэлээх полка” улуустааҕы акцияҕа эмиэ виртуальнай ньыманан кыттыахтара. Олохтоохтор бэйэлэрин олбуордарыттан “Кыайыы чүмэчитэ” акцияҕа онлайн кыттыахтарын сөп. Ити күн тэрээһиннэрэ Саҥата суох кэриэстээһин мүнүүтэтинэн түмүктэнэллэр.
Ыам ыйын 9 күнүгэр өрөгөйдөөх тэрээһиннэр Чурапчы улууһун баһылыга А.Т.Ноговицын уонна дьокутааттар Сэбиэттэрин бэрэссэдээтэлэ А.А.Захаров эҕэрдэлэриттэн, нэһилиэктэр баһылыктара Кыайыы 75 сылын көрсө миэстэтигэр ыыппыт үлэлэрин кылгастык ойуулааһыннаах видеонан эҕэрдэлэриттэн саҕаланыахтара. Итини сэргэ С.Д.Флегонтов, Г.Д.Протодьяконов, С.К.Макаров, И.М.Павлов бойобуой уордьаннарын илдьэ бэтэрээннэр видеонан тахсыахтара. Улуус бэтэрээннэрин Сэбиэтин бэрэссэдээтэлэ, Судаарыстыбаннай Мунньахха норуот дьокутааттара, ону сэргэ улуус баһылыгын сүрүннүүр Сэбиэтин чилиэннэрэ туспа эҕэрдэлиэхтэрэ, нэһилиэктэртэн ыччат хамсааһыннара Кыайыы 75 сылыгар ыыппыт үлэлэрин түмүктэрин туһунан видеороликтар тахсыахтара.
Бырааһынньык түгэннэрэ “Айхаллан, Чурапчы!” улуустааҕы фестиваль түмүктэринэн улахан гала-кэнсиэри көрдөрүүнэн уонна хоһоон ааҕааччылар куонкурустарын түмүктэрин онлайн-таһаарыынан, хаартыскалары, “Кыайыы, кыайыы күнэ!” хартыыналары көрдөрүүнэн түмүктэниэхтэрэ.
Билигин улуус олохтоохторо бу бырааһынньыкка кыттарга бэлэмнэнэллэр – кинилэр Кыайыы күнүгэр анаммыт араас куонкурустарга ыраахтан кыттыахтара, олбуордары, дьиэлэрин уонна подъезтары бырааһынньыкка киэргэтиэхтэрэ. Ону таһынан, саастаах дьону Инстаграмм социальнай ситимнэринэн туһанарга көмөлөһүөхтэрэ. Бырааһынньык тэрээһиннэригэр быһа эфиринэн кыттыһар туһугар саастаах дьон @mochurapchinsky, @sanaoloh, @selo_churapcha, @aylgy, @ayllaan_churapcha сирэйдэр аккауннарыгар холбонуохтара.
«Чурапчы улууһа» МТ пресс-киинин иһитиннэриитинэн
-
0
-
0
-
0
-
0
-
0
-
0
