Алтынньы 28 күнүгэр Саха Өрөспүүбүлүкэтин оҕолорун уопсастыбаннай холбоһуктарын сойууhун көҕүлээhининэн Уус-Алдан улууhун «Өркөн» эбии үөрэхтээhин тэрилтэтин базатыгар улуустааҕы бырайыактыыр киин үөрүүлээх арыллыыта буолла. Бырайыактыыр киин үөрэнээччилэр, ыччаттар уонна нэhилиэнньэ киэҥ араҥата социальнай ис хоhоонноох, билиҥҥи кэмҥэ тоҕоостоох бырайыактары суруйан, араас таhымнаах грант куонкурустарыгар кытталларыгар көмө буолуоҕа.
Аныгы кэм ирдэбилинэн үөрэхтээһини ыытар, көхтөөх дьону иилиир-саҕалыыр муниципальных таһымнаах кииннэр 15 улууска тэриллиэхтэрэ. Ситим оскуола уонна эбии үөрэхтээһин тэрилтэлэрин иһинэн олохтонор. Тоҕо диэтэр тыа сиригэр нэһилиэнньэни билиигэ-көрүүгэ сирдиир дьонунан педагогтар буолаллара саарбахтаммат, маны тэҥэ уопсастыбанньыктары түмэр усулуобуйа: кэбиниэттэр, оборудование уонна Интэриниэт үөрэх кыһаларыгар толору хааччыллан турар. Ол аата сайдыы, кэскил туһугар бүттүүн турунарга, сонун идиэйэлэри таһааран, грант араас куонкурустарыгар кыттан, кыһалҕалары быһаарарга уонна тыа сиригэр тупсаҕай эйгэни олохтуурга болҕомто: харчы уонна ресурса ылар кыах үөскүө.
Үөрүүлээх тэрээhиҥҥэ ыҥырыылаах ыалдьыттар тыл эттилэр, бииргэ үлэлэhэр туhунан баҕаларын биллэрдилэр. Ол курдук, Уус-Алдан улууhун үөрэҕин, култууратын, ыччат политикатын управлениелара, нэhилиэктэр администрациялара, муниципальнай тэрилтэлэрэ уонна уопсастыбаннай түмсүүлэрэ күүһү түмэн, хардарыта дьайсан, үрдүк көрдөрүүлэргэ тахсар соругу туруордулар. Бэлиэтээн эттэххэ, гражданскай уопсастыба сайдыытыгар, чуолаан граннарынан элбэх үбү үмүөрү тардан, инники күөҥҥэ сылдьар улуустарынан: Горнай, Амма уонна Кэбээйи буолаллар. Маны таhынан уус-алданнар сыллааҕы үлэ былаанын торумнаатылар, туох тэрээhиннэр ыытыллалларын чопчулаатылар.
Өрөспүүбүлүкэ ситимигэр биир бастакынан кыттыспыт уонна үлэни сэргэхтик саҕалаабыт Уус-Алдан улууhун «Өркөн» эбии үөрэхтээhин тэрилтэтин дириэктэрэ Яков Колодезников маннык кэпсиир:
– Эбии үөрэхтээһин тэрилтэтэ урукку курдук оҕолору эрэ буолбакка, билиҥҥи кэмҥэ улахан дьону эмиэ саҥа билиинэн, сатабылынан хааччыйар таһымҥа тахсыахтаах. Маныаха сэргэх идиэйэлэр, сонун бырайыактар тула түмсэр саамай тоҕоостоох дии санаатыбыт. Бу киини тэрийэргэ оборудованиета гранынан куораттан кэлбитэ, онтон хос өрөмүөнүн уонна миэбэл харчытын үөрэхпит управлениета биэрдэ. Түгэнинэн туһанан улууспут дьаһалтатыгар, салайааччыларбытыгар: А.В. Федотовка, И.М. Тарскайаҕа улахан махталбытын биллэрэбит. Онтон дизайнын уонна тупсарар өттүн бэйэбит кэлэктииппит субуотунньуктаан ситистэ. Кырдьык, үлэлииргэ, айарга-тутарга бэлэм үлэһиттэрдээхпинэн киэн туттабын!
«Кырдьык, үтүө, истиҥ уонна үлэһит да дьон», – диэн санааҕа кэллибит тэрээһин кыттыылаахтара. «Бырайыактыыр киин сылтан сыл сайдан, дьоhун көҕүлээhиннэрдээх уопсастыбанньыктары үрдүккэ кынаттаан, өйдөрүн-санааларын сааhылаан, толкуйдарын олоххо киллэрэргэ тирэх буола турдун, улуус инники сайдыытыгар кимэн киириилээх хардыылары оҥордун», – диэн баҕа санаабыт бастыҥын эттибит уонна мантан салгыы кыттыгас тэрээһиннэри ыытарга, буолар үлэни сырдатарга бэлэммитин биллэрдибит.
Барыбытыгар даҕаны айар аартыктар арыллан истиннэр, үтүө санааны үксэтэргэ харгыстар суох буоллуннар, дьон сэргээн, истиҥ санаатынан кыттыстын, үлэбит түмүгэ үйэлээх буоллун!
-
0
-
0
-
0
-
0
-
0
-
0
