Биир бастыҥ үлэлээх түөлбэнэн “Куула түөлбэ” буолар. Түөлбэни Агафья Савватеева сатабыллаахтык салайар. “Куулалар” нэһилиэккэ ыытыллар бары тэрээһиннэргэ инники күөҥҥэ сылдьаллар. Ол курдук, оохтоохтор күүстэринэн оҕо былаһаакката оҥоһуллубута.
Быйыл Ил Дархан Граныгар тирэҕирэн, «Дьоруойдар искибиэрдэрэ» тутулунна. Искибиэр тутуута 895 тыһ. солк., итинтэн 300 тыһ. солк. улуус дьаһалтата көмөлөстө. Искибиэри Степан Петров салалтатынан түөлбэ олохтоохторо күргүөмүнэн турунан субуотунньуктаан, кыстык иннинэ тутан бүтэрдилэр.
Манна даҕатан суруйдахха, бу кырдьаҕас түөлбэҕэ эйэлээх олоҕу олохтоспут 22 сэрии уонна 96 тыыл бэтэрээннэрэ олорон ааспыттара.
Билиҥҥи уустук кэмҥэ дьону-сэргэни сомоҕолуур, ыччаты патриотическай иитиигэ сүрүннүүр маннык дьаһаллар ыытыллаллара дириҥ суолталаах, тоҕоостоох.
Алтынньы 18 күнүгэр Сэбиэскэй Сойуус Дьоруойа Федор Матвеевич Охлопков аатынан култуура уонна сынньалаҥ пааркатыгар аныгы ирдэбилгэ эппиэттиир, олохтоохтор сынньалаҥнарыгар аналлаах, 2022 с. «Тупсаҕай куорат эйгэтин тэрийии» федеральнай бырагыраамаҕа куоластааһын түмүгүнэн кыайыылаах тутуу үөрүүлээх быһыыга-майгыга аһылынна. Бу эбийиэк федеральнай бүддьүөттэн 30 мөл. солк., улуус уонна нэһилиэк бүддьүөттэриттэн 10 мөл. солк үбүлэммитэ. Ону аукциоҥҥа кыайбыт Семен Филатов биирдэм тэрилтэтэ алта ый устата тутан үлэҕэ киллэрдэ.
Бу курдук, таатталар икки сонун тутуулара кэм ирдэбилинэн норуокка ананан үлэҕэ киирдилэр.
-
12
-
0
-
0
-
0
-
0
-
0
