Былаан быһыытынан, муус устар 25 күнүгэр түмүктэниэхтээх пааматынньыктар өрөмүөннэрин үлэлэрэ өрөспүүбүлүкэ үрдүнэн эпидемиологическай балаһыанньа уустугунан болдьоҕо уһаан биэрдэ. Саха сирин үрдүнэн буойун-саллааттарга, Аҕа дойду Улуу Сэриитин кыттыылаахтарыгар анаммыт 210 өйдөбүнньүк паамытынньыга баара биллэр. Муниципалтнай тэриллиилэргэ уонна куорат уокуруктарыгар буойун-саллаат биир дойдулаахтарыгар анаммыт өйдөбүнньүк пааматынньыктар барытыгар баар буолары ситиспиттэр. Күн бүгүн өйдөбүнньүк пааматынньыктар өрөмүөн уонна саҥа тутуу үлэлэрэ Саха сирин үрдүнэн тохтоло суох ыытылла тураллар.
Ол курдук, Хаҥалас улууһугар Аҕа дойду Улуу сэриитигэр кыайыыны уһансыбыт “Катюша” бойобуой массыына макета оҥоһуллан туруоруллубута билиннэн. Бойобуой массыына макетын Покровскай куорат олохтооҕо Михаил Витальевич Трофимов оҥорбут.
Оттон Горнай улууһун биллиилээх рационализатор Захар Егорович Павлов уолунаан Георгийдыын Аҕа дойду Улуу сэриитигэр аатырбыт “Т-34” тааҥка макетын өйдөбүнньүк бэлиэ быһыытынан дьон-сэргэ көрүүтүгэр туруордулар.
Мэҥэ Хаҥалас оройуонун Аллараа Бэстээҕэр Уус Алдантан төрүттээх Иннокентий Колесов уонна Балыктаах нэһилиэгин ыччата Семен Кычкин “Т-34-85” тааҥка макетын оҥорон биир дойлуаахтарын сөхтөрдүлэр. Тааҥка сахаттан бастакынан Сэбиэскэй Сойуус Дьоруойа буолбут Ф.К. Попов уонна Улуу Кыайыыны уһансыбыт сэрии кыттыылаахтарын сырдык ааттарыгар ананан өйдөбүл уонна дириҥ махтал бэлиэтэ буолан Кыайыы болуоссатыгар туруорулунна.
Амма нэһилиэгэр норуот көҕүлээһининэн Т-34 тааҥка оҥоһуллан айаннаан кэллэ. Олохтоох көҕүлээһини өйүүр бырагырааманан Аммаҕа саҥа өйдөбүнньүк бэлиэ баар буолбута үөрүүлээх. Улуу Кыайыы 75 сылыгар таанка макета Албан аат болуоссатыгар таҥыллан туруорулунна.
Дьокуускайдааҕы “Туймаада саллаата” комплекска Аҕа дойду Улуу сэриитигэр кыттыбыт Саха снайперыгар анаммыт пааматынньык эбилиннэ. Бу өйдөбүнньүк “Мечел” тэрилтэ бэлэҕэ буолар.
-
0
-
0
-
0
-
0
-
0
-
0
