«3-тэн 16-гар диэри саастаах оҕолоох Россия олохтоохторо номнуо бэс ыйын 1 күнүттэн хас биирдии оҕоҕо 10 тыһ. солк. суумалаах биир кэмнээх төлөбүрү ылыахтарын сөп. Маннык материальнай көмөнү оҥоруу быраабылаларын бырабыыталыстыба бигэргэттэ», — диэн иһитиннэриигэ этиллэр.
Төлөбүрү ылар туһугар сайабылыанньа бэриллэр. Ону дистанционнай ньыманан судаарыстыбаннай өҥөлөр порталларын (госуслуги) нөҥүө, Пенсионнай фонда сайтыгар тус кабинекка эбэтэр киһи олорор миэстэтигэр баар сирдээҕи-уоттааҕы салааҕа тус бэйэтэ биэриэн сөп.
Сайабылыанньаны биэс күнтэн уһаппакка көрүөхтэрэ, оттон төлөбүрү үс күнү аһарбакка ыытыахтаахтар. Итинник төлөбүрү ылыыны алтынньы 1 күнүгэр диэри туруорсуохха сөп.
«Үһүгэр диэри саастаах оҕолоох Россия дьиэ кэргэттэрэ бары өссө биир өйөбүл дьаһалынан туһаныахтарын сөп. Кинилэр оҕолоругар анаан муус устарга, ыам ыйыгар уонна бэс ыйыгар 5 тыһ. солк. көрүллэр. Ону ылыыга эмиэ Пенсионнай фондаҕа сайабылыанньа биэриэхтээхтэр», — дэнэр иһитиннэриигэ.
Федерация Сэбиэтин социальнай политикаҕа кэмитиэтин баһылыга Инна Святенко эппитинэн, пандемия усулуобуйаларыгар 3-тэн 16-гар диэри саастаах оҕолорго төлөбүрү Россия дьиэ кэргэттэрэ дохуоттарын таһымыттан тутулуга суох бары ылыахтара. Кини маннык өйөбүлү ылар кыахтаахтарын туһунан дьиэ кэргэттэргэ киэҥник иһитиннэрэр наадалааҕын бэлиэтээтэ, ол курдук төрөппүттэр сайабылыанньаларынан эрэ төлөбүрдэри ааҕыахтара.
Бу иннинэ Россия президенэ Владимир Путин коронавирус пандемиятынан сибээстээн өйөбүл уочараттаах дьаһалларын туһунан иһитиннэрбитэ. 16-гар диэри саастаах оҕолорго төлөбүрдэри таһынан, дьиэ кэргэн биир киһитигэр дохуот айах ииттэн олоруу алын кээмэйиттэн намыһах буоллаҕына, 3-тэн 7-ҕэ диэри саастаах оҕолоругар төлөбүр оҥоһуллуохтаах диэн президент быһаарбыта.
-
0
-
0
-
0
-
0
-
0
-
0
