"Дьахтар төрүүр-ууһуур уоргана сыл-хонук ааһан истэҕин аайы кэхтэн барар. 35 саастарыттан доруобай, оҕо үөскэтэр кыахтаах яйцеклетка саппааһа олох намтыыр. Эдэр саастарыгар тус олохторун оҥостубатах дьахталлар сааһыран баран кыайан оҕоломмокко биһиэхэ кэлэллэр.
Санаан да көрдөххө, былыргы дьахтар 17 сааһыттан 35-гэр диэри уонча оҕолонор уонна орто сааһыгар эбии төрөөбөтөҕүнэ, ким даҕаны кинини төрүөҕэ суох диэбэт. Оттон аныгы дьахтар 40-чатыгар чугаһаан баран бастакы оҕотун төрүү сатыыр даҕаны, айылҕаны кыайан албыннаабаккын, туох барыта кэмнээх-кэрдиистээх.
Тымныы тыйыс айылҕалаах дойдуга олорорбут иһин буолуо, үгүс дьахтар яичнигын саппааһа атын эрэгийиэн олохтоохторун кытта тэҥнээн көрдөххө, эрдэ кыччыыр. Оннооҕор эдэр кыргыттар олус намыһах овариальнай саппаастаахтар. Кинилэр үгүстэрэ анемиялаахтар, гипотериозтаахтар, чуолаан йод, Д битэмиин тиийбэтиттэн, генетика оҥоһуутуттан төрүүр-ууһуур уорганнара эрдэ кэхтэн барар", - диэн этэр Национальнай мэдиссиинэ киинин оҕото суох дьахтар төрүүрүгэр көмөлөһөр аныгы репродуктивнай технология салаатын сэбиэдиссэйэ Айталина Семенова.
Дьахтар сааһыран истэҕин аайы яичнигын саппааһа аҕыйыырын таһынан, яйцеклетка хаачыстыбата мөлтүүр, ол иһин ЭКО табыллымыан сөп. Кыыс оҕо этэ-сиинэ саҥа тыллыбыт сибиэһэй кэмигэр бастакы оҕотун былаанныыра ордук диэн сүбэлииллэр быраастар. Саас ылан истэҕин аайы ЭКО көдьүүһэ эмиэ намтаан барар.
-
0
-
0
-
0
-
1
-
0
-
0
