"Гормональнай стимуляция уонча эрэ күн ыытыллар, онон дьахтар доруобуйатыгар охсуулаах диэҕи сатаммат. Ол эрэн биир даҕаны процедура куттала суох диир эмиэ табыллыбат. ЭКО-ҕа хас даҕаны фолликул үүннэрэн ылаары гормуон укуоллууллар, дьоҕус эппэрээссийэ (яичник пункцията) оҥоһуллар.
Тоҕус сыл тухары ОМС полиһынан ЭКО-ну буор босхо маассабайдык оҥорон кэллибит уонна ийэ, эбэтэр оҕо доруобуйатыгар маннык буортулаах диэн чопчу этэр кыахпыт суох. Киһи организма тус-туһунан ылынар.
Протоколга үүнүүнү биэрэр гормуону туттабыт, ол иһин дьахтар эмиийин, яичнигын сыл ахсын бэрэбиэркэлэнэ сылдьыахтаах. Эстроген гормуону кытта ситимнээх уоргаҥҥа болҕомто ууруллуохтаах. Миома, эндометриоз, кыра киста баар түгэнигэр кэтээн көрүөххэ наада", - диэн этэр Национальнай мэдиссиинэ киинин оҕото суох дьахтар төрүүрүгэр көмөлөһөр аныгы репродуктивнай технология салаатын сэбиэдиссэйэ Айталина Афанасьевна Семенова.
Жанна Фриске, хомойуох иһин, хойутаан ийэ буолбута уонна тута олохтон күрэммитэ. ЭКО-тан сылтаан, мэйиигэ искэн үөскээн, итинник эрдэ барда диэн биир да быраас эппэтэ.
Дьахтар хат буоллаҕына, иммуннай систиэмэтин үлэтэ уларыйар, ол иһин атын белогу, эмбриону тэйиппэт. Иммунитет мөлтөөбүт кэмигэр искэн килиэккэтэ хайдах буолара биллибэт. Онон кэлтэйдии ЭКО-ну эрэ буруйдуур тутах соҕус.
"Ону таһынан, гормуоннаах эмп-томп хааны хойуннарар, ол иһин, хааннарын баттааһына үрдүк, аймахтарыгар инсуллаабыт дьон баар түгэнигэр дьахтары эбии кэтээн көрөбүт, тромбофилияҕа анаалыс ылабыт. ЭКО кэмигэр уонна эмбриону көһөрөн баран хааны убатар эми аныыбыт", - диир быраас.
-
1
-
0
-
0
-
0
-
0
-
0
