Ааҕааччы туруорсар

Аныгы отель  

Сардаана Подрясова: “Хас даҕаны сөмөлүөтүнэн ыраах көтө сатаабакка, Москубанан эргийэн улахан куорат устун чымадаан соһон талыгырата сылдьыбакка, Сахабыт Сиригэр бары өттүнэн хааччыллыылаах, элбэх аралдьыйыылаах аныгы отельга дьиэ кэргэнинэн сынньаныахпытын, эмтэниэхпитин баҕарабыт. Турцияттан итэҕэһэ суох ас дэлэгэйэ, бассейн, баанньык, дьону сэргэхситэр кэнсиэр наада. Оччоҕуна төһөлөөх элбэх үлэ миэстэтэ тэриллэн, харчы өрөспүүбүлүкэ иһигэр хаалыа этэ», — диэн баҕа санаатын суруйар.  

Биллэн турар, Саха Сирин уонна Турция айылҕата, туризм сайдар кэскилэ сири кытта ыйы тэҥнээбит курдук. Анталья кытылыгар төгүрүк сыл күн сандаарыччы тыгар, туристар алтынньы бүтүөр диэри сылаас, ыраас уулаах муораҕа сөтүөлүүллэр.

Оттон Саха Сиригэр сайыммыт чыычаах түннүк нөҥүө көтөн ааһарын кэриэтэ кып-кылгас, аны бырдаҕа элбэҕэ, ойуур баһаарын буруота сыл ахсын арахпакка буулуур. Улахан сүүрүктээх эбэ уута тымныы, кыайан өр сөтүөлээбэккин. Ол иһин туризм сайдар, Турцияны кытта тэҥнэһэр кыаҕа суох.

Күһүн-саас суол-иис алдьанар, өрүс суола сабыллар кэмигэр, кырыа кыһын  санаторийга аһыы-аһыы хоскор сытаргар тиийэҕин, маннык сынньалаҥ эдэр дьоҥҥо сөп түбэспэт.

Эргэрэн-эмэҕирэн бүттүлэр  

Арай, ыраах айаны тулуйбат, биэнсийэҕэ олорор кырдьаҕастарга, элбэх оҕолоох ыалга,  кыра хамнастаах үлэһиттэргэ бары өттүнэн хааччыллыылаах санаторий хайаан да наада. Холобур, үс-түөрт оҕолоох ыал Турцияҕа уонча хонукка сынньана барарыгар путевка сыаната 500 000 солк. Маны таһынан, Москваҕа диэри бара-кэлэ дьиэ кэргэн хас биирдии чилиэнигэр айаныҥ ороскуота, аара тохтоон ааһарга хостел, аһыҥ ороскуота эбиллэр. Онон элбэх оҕолоох ыал ийэтэ-аҕата биир мөлүйүөн үптээх буоллахтарына биирдэ бары тутуспутунан муораҕа сынньанан кэлиэхтэрин сөп.

Кыра оҕолоох ыал эмиэ ыраах айанныыллара, Москуба курдук элбэх киһилээх метроҕа чымадааннарын соһоллоро эрэйдээх соҕус. Аны Сочи, Геленджик диэки кирдээх ууларын муораҕа тоҕоллоруттан оҕолор ротовирус ыарыынан үгүстүк ыалдьаллар, сүүһүнэн тыһыынчалаах путевка төлөммүтүн кэннэ тугу да кыайан аһаабаттар. Эмтэнэ, сынньана барбыт оҕо төттөрүтүн ыалдьан кэлэр диэн кэпсииллэр.

Өрөспүүбүлүкэ алмаастаах бүддьүөккэ олорор, айылҕа баайыттан, экэниэмикэ атын да салаатыттан киирэр дохуот сыл ахсын эбиллэн иһэр даҕаны, нэһилиэнньэ доруобуйатын чэбдигирдэр биир да санаторий тутулла илик. Былыр Сэбиэскэй кэм саҕана тутуллубут санаторийдар: «Чэбдик» уонна «Абырал» эргэрэн-эмэҕирэн  бүттүлэр.

Аллараа Бэстээххэ Абалаах бадараанынан эмтиир санаторий эргэрэн инньэри-ханньары түспүтүн саҥардар киһи көстүбэтэ. Куоракка “Манньыаттаах” ырыынак диэки баар «Хоту» санаторий кирэдьииккэ киирэн, үлэһиттэрин хамнаһын кыайан төлөөбөккө сабыллыбыта.

Санаторийга тиксэр уустук

Бар дьон доруобуйатын айгыраппыт COVID-19 кэнниттэн үгүс киһи наһаа умнуган буолла, дьахталлар баттахтара сүүмэҕинэн түһэр, дьарҕа ыарыылаахтар сүһүөхтэригэр, тыҥаларыгар оҕустардылар. Ону чөлүгэр түһэрэргэ аныгы олох ирдэбилигэр эппиэттиир санаторий  суох. 

Бу кыһалҕаны хайдах быһаарыахха сөбүн билээри СӨ Идэлээх сойуустарын федерациятыттан өрөспүүбүлүкэ иһигэр санаторнай-курортнай эмтэнии хайдах тэриллэрин туһунан ыйыталастыбыт.

«Турция отелларын курдук үрдүк таһымнаах дьон сынньалаҥын хааччыйар бырайыагы олоххо киллэрэргэ үтүмэннээх үп-харчы көрүллүөн наада. Дьоҕус, орто урбаан ылыстаҕына даҕаны, судаарыстыба өттүттэн өйөбүл эрэйиллэр. Аҕа көлүөнэни өйөөһүн бырагыраама чэрчитинэн, социальнай тэрилтэлэри субсидиялаатахха, ити боппуруоһу быһаарыахха сөп.

Күн бүгүн өрөспүүбүкэ иһигэр баара-суоҕа үс санаторий хаалла: «Чэбдик», «Абырал», итиэннэ «Якутуголь» санаторийа – “Горизонт”, оттон оҕолорго «Сосновый бор» баар. Ону таһынан, Москваҕа «Бэс чагда» үлэлиир.

Сардаана Подрясова сөпкө этэр, баҕалаах дьон барыта санаторийга киирэн кыайан эмтэммэт. Санаторийдар судаарыстыба сакааһын толороллор, кэммиэрчэскэй дуогабарынан аҕыйах киһини ылаллар. “Горизонт” санаторийга таас чох бырамыысыланнаһын үлэһиттэрэ эрэ сынньаналлар. Атын санаторийдар туолан тураллар, куруук үп-харчы кырыымчыга атахтыыр.

Санаторнай-курортнай эмтэниигэ наадыйар киһи элбэх, дьону чэбдигирдэр тэрилтэлэр төгүрүк сыл үлэлииллэригэр хомунаалынай ороскуоттарын толуйарга судаарыстыбаттан көмө оҥоһуллуон наада.

Биһиги ити тарбахха баттанар санаторийдары харыстыырга, салгыы сайыннарарга СӨ Бырабыыталыстыбатын уонна Ил Түмэн иннигэр туруорсабыт даҕаны, дьиҥ чахчы өйүүр киһи суох. Барылааман истиитэ, Бырабыыталыстыба мунньаҕа буолбута эрээри, бу боппуруос быһаарылла илик», — диэн этэр СӨ Идэлээх сойуустарын федерациятын бэрэссэдээтэлэ Николай Дегтярев.

Булгуччу сертификаттаах буолуохтаах

Дьиҥэр, санаторийга эмтэммит дьон кыһын гириипкэ ылларбаттар, дьарҕа ыарыылара намтыыр, иммунитеттара күүһүрэр. Нэһилиэнньэ доруобуйатын бөҕөргөтүү олохпут уһууругар, демография көрдөрүүтэ тупсарыгар быһаччы сабыдыаллыыр.

«СӨ Доруобуйатын харыстабылын министиэристибэтэ ОМС нөҥүө үбүлээһин суоҕунан сибээстээн, санаторнай-курортнай эмтэниинэн дьарыктанартан аккаастанар. Дьиҥэр, ОМС-ка ити хайысхаҕа туһунан салаа баарын үрдүнэн болҕомто ууруллубат.

Оттон судаарыстыбаннайа суох тэрилтэлэр, урбаанньыттар ирдэбил үрдүгүттэн бэйэлэрин үптэригэр санаторий тутан таһаарар кыахтара суох. Дьону эмтиир тэрилтэ, санаторий булгуччу сертификаттаах буолуохтаах.

Көннөрү сынньалаҥы тэрийэргэ, сертификата суох мэдиссиинискэй өҥөнү оҥорорго урбаанньыттар дьон сынньанар дьиэлэрин, туризм эбийиэктэрин тутуохтарын сөп. Маны олоххо киллэрэргэ Дьокуускай куорат дьаһалтата сир учаастагын биэриэн наада. Оччоҕуна дьон сынньанар баазата кэлин үүнэн-сайдан, нэһилиэнньэни чэбдигирдэр кииҥҥэ кубулуйуон сөп», — диэн быһаардылар СӨ Идэлээх сойуустарын федерациятыгар.

Бэрэссэдээтэл Николай Дегтярев судаарыстыбаннай, муниципальнай былаас уорганнарын уонна урбаан бэрэстэбиитэллэрин кытта бу буоппуруоһу дьүүллэһэргэ бэлэмин биллэрдэ.

СӨ Үлэҕэ уонна социальнай сайдыыга министиэристибэтэ өрөспүүбүлүкэ иһигэр күн бүгүн «Чэбдик» уонна «Абырал» санаторий үлэлии турарын туһунан иһитиннэрдэ.  Ити икки санаторийга киирээри кырдьаҕастар хас да сыл уочараттыыллар, путевканы үксүн хоту улуустарга биэрэллэр.

Термальнай уу баар эрээри...

Сунтаар Кэмпэндээйитигэр сүһүөх ыарыыларын, кыайан оҕоломмот дьахталлары эмтииллэр даҕаны, киин сиртэн тэйиччи, тайҕа быыһыгар турар буолан, эмтэнэ барааччы аҕыйах.  

Нерюнгри оройуонугар, Нахот термальнай минеральнай уулаах аһаҕас уонна бүтэй бассейна баар, онно кыһыннары  уу +32С сылаас. Манна 1980-ус сылларга санаторий тутуохтарын баҕарбыттара эрээри, тоҕо эрэ кыаллыбакка кэлин турбаза оҥорбуттара.

Саха Сиригэр туризм урбаанньыттар күүстэринэн эрэ сайда сатыыр. Кэлиҥҥи кэмҥэ айылҕаҕа дьиэ кэргэнинэн сынньанар дьиэлэр тутулуннулар эрээри, усулуобуйата походнай.

Дьиҥэр, өрөспүүбүлүкэҕэ эмтээх бадарааннаах, минеральнай уулаах сирдэр бааллар эрээри, ону туһаммаппыт. Аныгы олох ирдэбилигэр эппиэттиир, төгүрүк сыл үлэлиир санаторий тутан таһаардахха, олохтоох дьон дойдуларыттан ырааппакка эрэ доруобуйаларын чэбдигирдиэ этилэр. Ону олоххо киллэрэргэ бүддьүөттэн үп-харчы көрүллүөн, эбэтэр туораттан үбүлээччи көстүөн наада. "Ил Түмэн" хаһыат эрэдээксийэтэ итиниэхэ сыһыаннаах төгүрүк остуол ыытыаҕа. 

Хаартыска: куйаар ситимиттэн