"Биһиэхэ Москваттан «Альтра Вита» клиникаттан репродуктологтар, эмбриологтар кэлэн үлэһиттэрбитин үөрэтэн барбыттара. Онон сылга 300 ЭКО оҥорор кыахтанныбыт. Оборудованиебыт саҥардыллара буоллар, үлэбит көрдөрүүтэ өссө тупсуо этэ. Сылга 700 киирэр сайабылыанньаны барытын толорорго лабораториябыт кыамтата кыра", - диэн билиһиннэрэр Национальнай мэдиссиинэ киинин оҕото суох дьахтар төрүүрүгэр көмөлөһөр аныгы репродуктивнай технология салаатын сэбиэдиссэйэ Айталина Афанасьевна Семенова.
Пробиркаҕа оҥоһуллубут оҕо өйдөөх буолар
ОМС хайысхатынан босхо ЭКО оҥорорго сааһынан хааччахтааһын суох, хаһан сатаныар диэри хаста даҕаны холонон көрүөххэ сөп эрээри, хас биирдии дьахтар овариальнай саппааһын көрөллөр. АМГ анаалыһа 2,4 — 6,8 буолуохтаах. Фолликулун саппааһа аҕыйаабыт 1,2 АМГ-лаах дьахталлары ылбаттар. Кинилэр харчы төлөөн, ЭКО оҥотторуохтарын сөп. Өскөтүн фолликул тиийбэтэҕинэ, эбии донорскай ооцит атыылаһаллар, оччотугар дьахтар бэйэтин хаан оҕото буолбат.
"Лабораторияҕа оҥоһуллубут оҕолор доруобай төрүүллэр, өйдөөхтөр, үөрэҕи ылынымтыалар дииллэр. Өр күүтүүлээх, баҕалаах, тапталлаах оҕолорун кытта төрөппүттэр куруук кэпсэтэллэр, кинини кытта дьарыктаналлар, ол иһин сайдан иһэллэр", - диир Айталина Афанасьевна.
- 1
- 0
- 0
- 0
- 0
- 0