Санитарнай-эпидемиологическай балаһыанньа уустугурбутунан, Ил Дархан Айсен Николаев маҕаһыыннарга, атыы-эргиэн кииннэригэр, кафеларга, эрэстэрээннэргэ, о.д.а. элбэх киһи мустар сирдэригэр туох баар санитарнай-эпидемиологическай ирдэбиллэри күүскэ хонтуруоллуурга ыҥырда. Маай уонна Кыайыы күннэрэ онлайн буолуохтара. Бырааһынньыктааҕы салюттар, култуурунай-маассабай уонна аралдьытар тэрээһиннэр өрөспүүбүлүкэ сиригэр-уотугар бүтүннүүтүгэр тохтотуллаллар. Муниципальнай уонна биэдэмистибэннэй тэрээһиннэри аһаҕас салгыҥҥа ыытыыга 65 саастарын ааспыт дьон булгуччулаах кыттыылара көҥүллэммэт. Бэтэрээннэргэ бэлэҕи туттарыыга уонна тиэрдиигэ коронавирус дьаҥыттан быһыыны толору ылбыт волонтердар эрэ үлэлиэхтэрэ. Бу буолаары турар пасха уонна да атын итэҕэл бырааһынньыктарыгар эмиэ кытаанах хонтуруол олохтонуоҕа, харыстыыр миэрэлэри тутуһан ыытыыны хааччыйыахтара.
Манна даҕатан эттэххэ, Маай өрөбүллэригэр балыыһалар үлэлииллэр. Вакцинация биэрэр пууннар эмиэ. Муус устар 29 күнүнээҕи туругунан, өрөспүүбүлүкэҕэ 114 412 доза быһыы кэлбитэ биллэр. Быһыыны биэрии саҕаланыаҕыттан 106 576 киһи бастакы быһыыны ылбыт, иккиһи -- 62 524. Ол аата өрөспүүбүлүкэҕэ кэлбит вакцина 93,9%-а бэриллибит.
-
0
-
0
-
0
-
0
-
0
-
0
