Бу сыстыганнаах COVID-19 дьаҥын вакцина эрэ тохтотуо. Ааспыт сууккаҕа 155, ол иннинээҕи күҥҥэ 160 киһи коронавирустаабыта биллибитэ. Аны, "бразильскай" штамм өрөспүүбүлүкэбитигэр булуллубутун туһунан СМИ сырдаппыта.
Ковидтан өлүү 901 киһиэхэ тиийдэ. Ити өссө официальнай дааннайынан. Уопсайынан, 2020, 2021 сылларга өлүү ахсаана өрөспүүбүлүкэбитигэр биллэ улааппыт. Холобура, былырыыҥҥы 2020 сылы бу курдук суруйаллар: “ В 2020 году смертность на фоне пандемии возросла на 1480 человек по сравнению с 2019 годом (7601). Основными причинами смерти якутян в 2020 году были: болезни системы кровообращения (43,6% от всех смертей); онкология (14,2%); внешние причины смерти (13,3%)”. Оттон бу 2021 сылы киһи саныан саллар.
Бу күннээҕи туругунан ыарыы саҕаланыаҕыттан барыта 44 876 киһи коронавирустаата, итинтэн 39 702 киһитэ үтүөрбүт. Кэлиҥҥи кэмҥэ оҕолор ыалдьар буолбуттара дьиксиннэрэр.
Коронавирус аны саҥа “дельта” штаммата биһиэхэ кэлэн иһэр. Бу дьаҥҥа сөтөллүү, температура үрдээһинэ диэн суох үһү. Ол оннугар сүһүөх, төбө, күөмэй, тыҥа ыалдьар. “Дельта” быдан уодаһыннааҕын бэлиэтииллэр. Маны таһынан “индийскэй” уонна “британскай” штаммалар тарҕанан эрэллэр. Кинилэртэн быыһанар суол вакцинация эрэ баарын быраастар нэһилиэнньэҕэ этэ сатыыллар.
Хомойуох иһин, Арассыыйа иһигэр уонна Украинаҕа, Европаҕа вакцинация туһунан антиагитацияны ыытар дьон баар. Сорохтор сымыйанан "уопуттаах бырааспын, мэдиссиинэ наукатын учуонайабын" диэн, арааһы кэпсииллэр, ол-бу кэмпириэнсийэни, симпозиуму оонньоон көрдөрөллөр. Ону социальнай ситимнэринэн репостаан, нэһилиэнньэ өйүн-санаатын бутуйаллар, тэптэрэн биэрэллэр.
Евросоюз, АХШ бэйэлэрэ вакцинация бөҕө ыллылар. Кинилэргэ вакцинаҕа уочарат, былдьаһык. Билигин Евросоюз 27 судаарыстыбата, ол эбэтэр 71%-на вакциналанна. Атын тас 48 дойдуга нэһилиэнньэ 60%-ныттан элбэҕэ быһыыны ылла. Ол дьон обругулар туһалааҕын билэн эрдэхтэрэ...
Кырдьык, өлбүт дьон ахсааныттан вакцина ылбыт дьон 1,5- 2% кэриҥэ ковидынан ыалдьан өлөллөр. Олор ыалдьа сылдьан көрдөрбүттэрэ эбитэ буоллар, “медотвод” ылыахтаахтар этэ. Оттон өлүү 98%-на – быһыы ылбатах дьон. Ыалдьыы эмиэ соннук хартыына, бэйэҕит тэҥнээн көрүҥ.
Саха сирин олохтоохторо коронавирустан вакцинаны маассабайдык ылыаҕыҥ, нэһилиэнньэ улахан дьоно 60-70% вакциналаннаҕына эрэ “коллективнай иммунитет” үөскээн, инфекциия тарҕаныытын кыайыахпыт! Арҕаа дойду, Украина "быраастарын" агитациятын буолбакка, нэһилиэкпит, улууспут, өрөспүүбүлүкэбит эмчиттэрин, салалтатын истиэҕиҥ!
Михаил Архипов, биэнсийэлээх.
-
0
-
0
-
0
-
0
-
0
-
0
