Бу ыйга, кулун тутар 5 күнүгэр Госдуумаҕа олохтоох салайыныы туһунан сокуон үһүс ааҕыытыгар киириэхтээх, ылыныллар түбэлтэтигэр, муниципальнай былаас уорганнарыгар уларыйыылар тахсаллара дьэҥкэ.
Сир учаастагын хонтуруолга
Кулун тутар ыйтан саҥа олоххо киирэр сокуонунан учаастактары туһаҕа таһаарыыга үс сыллаах эбии болдьох бэриллэр буолуоҕа. Ити нэһилиэнньэлээх пууннар кыраныыссаларын иһигэр сытар садовай уонна оҕуруот учаастактарыгар сыһыаннаах. Онон учаастагы туһаҕа таһаарыыга бу иннинэ үс сыллаах болдьоххо эбии үс сыл эбиллиэҕэ. Инньэ гынан, хас биирдии киһи учаастагы туһаҕа таһаарарыгар уопсайа 5-7 сыл бэриллэр буолар. Ол бу сыл кулун тутартан атыылаһыллыбыт эбэтэр бэлэххэ бэриллибит сир учаастагын туһаҕа таһаарыы регистрацияламмыт күнүттэн ааҕыллар. Бу нуорма, бастатан туран, кыһалҕалаах учаастактары таарыйар диэн Росреестр быһаарар. Онон учаастак сирин бас билээччи отунан-маһынан үүммүтүн, ууга барбытын чөлүгэр түһэрэр эбэтэр бөҕүнэн-сыыһынан туолбутун ыраастыыр эбэһээтилистибэнэр.
Олорор дьиэни тутуу
Даача учаастагар дьиэ туттарга дуогабар түһэрсиигэ кулун тутар ыйтан эскроу счеттар киирэн бириэхтэрэ. Урут бу иннинэ эскроу счеттары хампаанньалар бүтүн бөһүөлэк дьиэлэрин маассабайдык туталларыгар туһанар буолаллара. Саҥа сокуон үлэҕэ киирэринэн, тутуу үлэтэ аһаҕас буолуо уонна хас биирдии киһи туһанара ирдэниэ. Онон эскроу счеттан харчыны бэдэрээтчик дьиэни тутан үлэҕэ киллэрбитин эрэ кэннэ туһанар буолуоҕа. Бу дьаһал дьон-сэргэ үптэрин-харчыларын харыстыаҕа, холобур, бэдэрээтчит дьиэни тутуута болдьоҕор туттарыллыбатах буоллаҕына. Манна даҕатан эттэххэ, дьиэни чэпчэтиилээх ипотеканан ылыан баҕалаахтар эмиэ эскроу счеттары туһаналлара ирдэниэ. Санаттахха, ааспыт сыл от ыйыттан «Дьиэ кэргэн» эбэтэр IT чэпчэтиилээх ипотеканан олорор дьиэни тутуу эскроу счета суох ыытыллыбат буолбута.
Хомунаалынай өҥө төлөбүрэ
Билигин Арассыыйа олохтоохторо хомунаалынай төлөбөрү икки ньыманан төлүүллэр: счетчик көрдөрүүлэринэн эбэтэр сыл устата ааҕыллыбыт төлөбүр кээмэйинэн. Кулун тутар ыйтан счетчигынан төлүүр барыстаныа. Холобур, сайыҥҥы өттүгэр төлөбүр кээмэйэ биллэрдик аччыыр. Ону таһынан сыл устата төлөбүр туһаныллыбыт ититии кээмэйинэн эрэ ирдэниэҕэ.
Кирэдьииттэн көмүскэнии
Саҥа ыйтан олохтоохтор кирэдьиити ылыыга бэйэлэрин хонтуруолга ылыахтарын сөп. Ол курдук, Судаарыстыбаннай өҥө порталын нөҥүө сайабылыанньа ыытан, хас биирдии киһи кирэдьиит ыларын тохтотор бырааптанар. Оттон балаҕан ыйын 1 күнүттэн сайабылыанньаны Элбэх өҥөнү оҥорор кииннэр нөҥүө ыытар буолуохтара. Саҥа сокуон түөкүттэри утары үлэлиир.
Табаары маркировкалааһын
Маҕаһыыннарынан анал QR-кодтаах маркировкаламмыт табаар элбиэҕэ. Холобур, маҥаһыыннарга штрих-кодунан табаары атыылыыр устугурар. Соктары, муоруһу, кэнсиэрбэни, соустары, туманы, о.д.а. табаары кассаҕа атыыһыт QR-кодунан эрэ атыылыыр бырааптанар.
Хамнастаах уһуйааччы
Кулун тутар 1 күнүттэн уһуйааччы үлэһит хамнастаныа. Бу күнтэн ыла үлэ биэрээччи маннык үлэһиккэ бирикээһинэн эбэтэр атын докумуонунан хамнас аныахтаах. Итини хамнаска эбилик эбэтэр саҥа дуоһунас эбиллэн төлөнөр буолар. Ону таһынан уһуйааччы буоларыгар сайабалыанньа ылар булгуччу ирдэнэр.
Байыаннай биэнсийэ
Бу сыл кулун тутар 1 күнүттэн байыаннайдарга уонна онно тэҥнээхтэргэ биэнсийэ төлөбүрүн кээмэйэ индексацияланар. Ол курдук, кэлэр ыйтан байыаннай бэтэрээннэр уонна байыаннай сулууспалаахтар биэнсиэйэлэригэр эбии төлөбүр ылыахтара. Инфляция таһымын учуоттаан, биэнсийэ 9,5%-нан эбиллиэҕэ. Санаттахха, бу иннинэ былырыын сэтинньи 1 күнүттэн биэнсийэ 5,1%-нан үрдэтиллибитэ. Оттон бу сыл кулун тутар ыйыттан байыаннай биэнсийэлээхтэр саҥа коэффициенынан ааҕыллыбыт индексацияламмыт төлөбөрү ылыахтара. Ортотунан биэнсийэ эбиллэн ааҕыллыбыт кээмэйэ 43 тыһ. солк. буолуоҕа.
Сорох табаары атыылыыр хааччахтанар
Дойду үрдүнэн арыгыта суох тонизирующай утахтары сокуоннай саастарын ситэ оҕолорго атыылыыр бобуллар. Манна энергиэтик утахтар эмиэ киирэллэр. Бу иннинэ ити утаҕы дойду бары эрэгийиэннэрин маҕаһыыннарыгар хааччахаҕа суох атыылыыр этилэр. Атыылаһааччы сааһын докумуонунан бигэргэппэтэҕинэ, утаҕы атыылаһара бобуллар. Ону кытта зажигалканы, о.д.а. атын гаастаах табаардары атыылыыр хааччахтанар.
Хаартыска эрэдээксийэ архыыбыттан
-
0
-
0
-
0
-
0
-
0
-
0
