СӨ култуураҕа уонна духуобунай сайдыыга миниистирин солбуйааччыта Владислав Левочкин биэдэмистибэттэн «Истоки» атыы-дьиэ арыгы бородууксуйатын оҥорон таһаарааччыга сурук ыыппыттарын туһунан иһитиннэрдэ.
- Маннык ааттаах-суоллаах арыгы атыыга тахсыыта уопсастыбаҕа таҥнары дьайыыны үөскэттэ, - диэтэ Хомус аан дойдутааҕы түмэлин уонна киинин дириэктэрэ Дмитрий Бястинов. - Биһиги үгэскэ кубулуйбут култуурунай-духуобунай сыаннастарбытын таарыйар. СӨ култуураҕа уонна духуобунай сайдыыга миниистирин бастакы солбуйааччыта маннык ааттаах арыгыны оҥорон таһаарыыны сиэри таһынан быһыынан ааттаата.
Юристар арыгыны ааттааһыҥҥа «Хомус» диэн тылы туһанары сокуону кэһиинэн ааҕаллар. Ол курдук, 2019 с. хомус Саха сирин материальнайа суох нэһилиэстибэтин реестригэр киллэриллибитэ. «Арыгы этикеткатыгар QR-коду сканердаатахха сахалыы таҥастаах кыыс дьүһүнэ ойууланар. Сокуоннай сааһын туола илигэ көстөр. Биллэн турар, сокуоннай сааһын ситэ илик оҕо дьүһүнүн арыгы бородууксуйатыгар туһаныы, "Реклама туһунан" федеральнай сокуонун кэһии буолар», — диэн интеллектуальнай бас билии уобалаһыгар юрист Юлия Бурнашева бэлиэтиир.
Хомус биһиэхэ – төрүт дорҕооммут, куйаары кытары ситиммит, өбүгэбит бэлэҕэ, ытыс саҕа ымыыбыт, духуобунай бэлиэбит, арчылыыр дьүрүскэммит, култуурабыт көрүҥэ, устуоруйабыт сорҕото.
«Биһиги өрөспүүбүлүкэбит урбааҥҥа, эргиэҥҥэ уонна туризмҥа министиэристибэтэ биһигини өйүөхтэрэ диэн эрэнэбит. Эбиитин сорох урбаанньыттар бу бородууксуйаны оҥорон таһаарыыны утары этилиннилэр», - диэн култуура эйгэтин бэрэстэбиитэллэрэ иһитиннэрдилэр. Хомус түмэлигэр: - Вологодскай уобаласка «Хомус» арыгыны оҥорон таһаарааччыга быһаччы этиниэхпит, - диэн иһитиннэрдилэр. Бу дьыалаҕа уопсастыбаннай палаата эмиэ сыһыарыллыаҕа.
Бу туһунан мусукаан, хампаһыытар, үгүс ырыа ааптара, уһуйааччы, аан дойдуга аатырбыт “Айархаан” этно-бөлөҕү төрүттээччи, салайааччы уонна эстрада тыйаатырын хомусчута Альбина Дегтярева инстаграмҥа суруйар:
- Норуот ытык өйдөбүлэригэр ытыктабыллаах сыһыан баар буолуохтаах дии саныыбын. Олох сайдан, уларыйан истэҕин аайы өссө харыстабыллаахтык сыһыаннаһыахтаахпыт. Ытык өйдөбүллэри өрө тутан, ыраастык илдьэ сырыттахпытына эрэ кэлэр кэнчээри ыччаппытын үтүөҕэ үөрэтиэхпит, норуот быһыытынан тыыннаах хаалыахпыт. Итинник санааттан мин "Хомус куйаарын дьүрүлэ" - "Музыка вселенной хомуса" диэн кинигэбэр "Хомусчут сиэрэ" - "Этика хомусиста" диэн суруйбутум. Кинигэттэн ол суруйуубун таһаардым.
Билигин аат-суол, «хайп», харчы туһугар, харах харанарыыта, сиэр-майгы уларыйыыта диэн хомойуох иһин, күннээҕи олохпутугар баар суол...
Сырдык, ыраас эйгэлээх хомуспутун ыраастык, өрө тутуоҕун!!! Саха Сирин биир саамай биллэр брендын итинниккэ туһанан сыыһа, норуот духуобунай култууратын, ытык өйдөбүллэри тэпсии, таҥнары тардыы дии саныыбын... Хайдах итини көмүскүүбүт?!
Санатар буоллахха, ааспыт нэдиэлэҕэ социальнай ситимнэринэн «Хомус» арыгы киин куоракка атыыланарын туһунан сонун тарҕаммыта. Уопсастыбаҕа бу быһыы-майгы хайдаҕын кэтээн көрөн сыаналаатахха: сорох утары этинэр, атыттар саҥа арыгыны амсайар туһуттан атыылаһа, көрдүү сорунар.
Хомус түмэлин үлэтин туһунан сиһилии «Норуоттары сомоҕолуур Ил Хомус» диэн Анисия Иевлева матырыйаалыгар ааҕын.
https://www.sakhaparliament.ru/sa/tysylge/4013-2020-12-02-01-08-03
-
0
-
0
-
0
-
0
-
0
-
0
