Быйыл үөрэххэ ылыы үлэтэ коронавирус пандемията киллэрбит быраабылаларынан арыый атын буолла. Бастатан туран, биир кэлим эксээмэни үрдүк үөрэх кыһаларыгар киирэрэгэ санаммыт оҕолор эрэ туттараллар. Иккиһинэн, биир кэлим эксээмэннэри туттарыы болдьоҕо уларыйда. Ол курдук, быйыл оскуоланы 7948 оҕо бүтэрбититтэн, 5991 оҕо БКЭ туттаралларын туһунан эппиттэр. Дьоһун биричиинэннэн от ыйыгар БКЭ сатаан туттарбатах оҕолор атырдьах ыйыгар туттарыахтарын сөп. Ол эрээри, быйыл намыһах баалга туттарбыттарга хос туттарыы көрүллүбэт.
СӨ үөрэххэ уонна наукаҕа министиэристибэ пресс-сулууспата улуустарга БКЭ ыытарга бэлэмнэнии үлэтин туһунан таһаарбыт. Быйыл ирдэбил быһыытынан БКЭ тэрийэн ыытар бары пууннар санитарнай дезинфекцияны ааһыахтаахтара уонна үлэһиттэр, оҕолор бары харыстанар сириэстибэлэринэн хааччыллыахтаахтара. Эксээмэни туттарааччылар бэйэ-бэйэлэриттэн 1,5 м. тэйиччи олоруохтаахтар. Биэдэмэстибэ иһитиннэрбитинэн, эксээмэни ыытар пууннар бары ирдэнэр дезинфекцияны ааспыттар, харыстанар сириэстибэлэринэн хааччыллыбыттар.
Аллайыаха улууһугар 9 выпускник эксээмэн туттарар, БКЭ ыытар биир пуун үлэлиир уонна онно Чокурдаах орто оскуолатын иһинэн икки аудитория анаммыт.
Горнайга 5 пууҥҥа эксээмэни тутуохтара – Киров, Кэптэҥи, Атамай, Бэрдьигэстээх уонна Өрт оскуолаларыгар. Быйыл горнай улууһун оскуолаларын 150 оҕо бүтэрбититтэн, 98 оҕо БКэ туттарар баҕалааҕын биллэрбит.
Амма улууһугар БКЭ ыытар пууннарыгар уонна 22 аудиториятыгар бактериялары өлөрөр анал рециркулятордар туруоруллубуттар.
Өрөспүүбүлүкэҕэ уопсайа биир кэлим эксээмэни ыытар 200 пуун үлэлиэҕэ.
-
0
-
0
-
0
-
0
-
0
-
0
