Норуот дьокутаата хоту сиригэр үөрэх салаатын сайыннарыыга Саха сиригэр ыытыллар үлэ уопутун билиһиннэрдэ. Төрүт тылы харыстааһыҥҥа, сайыннарыыга ыытыллар үлэлэр, “Аартыка учуутала”, “Аартыка улуустарыгар үлэлиир учууталлары олорор дьиэнэн хааччыйыы”, “Аартыка цифровой оскуолата”, “Аартыка” экспериментальнай оскуола-интэринээт”, “Норуоттар икки ардыларынааҕы Аартыка” оскуолата” бырайыактар туһунан кэпсээтэ.
Феодосия Габышева Аартыкаҕа оскуолаларга учуутал тиийбэтин кыһалҕатын таарыйда. Кини хоту оройуоннарыгар бырамыыссыланнас сайдарынан техническэй хайысханан каадыры бэлэмнээһин үлэтэ күүскэ ыытыллыахтааҕын, олохтоох сирдэргэ тустаах идэлэргэ үөрэтэр үөрэх кыһалара тэриллэллэрэ көдьүүстээх буолуоҕун ыйда.
Норуот дьокутаата үрдүк, орто үөрэх кыһаларыгар бүддьүөт миэстэтин түҥэтии мэхэнньиисимэ уларыйара болдьоспутун, каадыры бэлэмнээһиҥҥэ улахан хампаанньалары кыттыһыннарар тоҕоостооҕун, орто үөрэх тиһигин кэҥэтэр кэм кэлбитин бэлиэтээтэ.
“Билигин баар кыһалҕалары быһаарар туһуттан аҕыйах ахсааннаах төрүт норуоттар олорор сирдэригэр эдэр дьоҥҥо кэмигэр уонна сөптөөх үөрэҕи биэрэр систиэмэни тэрийиэххэ наада – идэҕэ үөрэтии туочукаларын уонна уопуттаах испэсэлиистэри кыттыһыннаран кэтэхтэн үөрэнии тиһигин тэрийиэххэ наада. Ол орто анал үөрэх тэрилтэтин ситимин саҥаттан көрөн оҥордохпутуна эрэ ситиһиллиэҕэ. Көс ыал үөрэнэр саастаах оҕолоро идэни баһылыылларыгар үлэ барыахтаах”, -- диэтэ.
Феодосия Габышева иһитиннэриитин түмүгэр “Орто анал үөрэх”, “Профессиональнай үөрэх” уонна “Аартыкаҕа каадыры бэлэмнээһин” блоктарынан этиилэри киллэрдэ. РФ норуоттарын төрүт тылларын сайдыытын институтун иһинэн “Арассыыйа аартыкатын оскуолата” диэн биир кэлим цифровой платформа тэрийэр, Аартыкаҕа ирдэнэр идэлэри чинчийэн баран идэҕэ үөрэтии методикатын хаачыстыбатын быһаарар бырагырааманы оҥорор, Аартыканы баһылааһыҥҥа наадалаах идэлэри бэлэмнээһин саҥа стандартын оҥорор, аартыка үрдүк үөрэх кыһалара үөрэтэр бырагыраамаларыгар эрэгийиэн этнографиятын үөрэтэр былааны киллэрэр туһунан уонна да атын этиилэри киллэрдэ.
Аартыкаҕа үлэлиир каадыры бэлэмнээһин хайысхатынан кэлэр кэмҥэ наадалаах буолар идэлэри учуоттаан дойду предпринимателлэрин сойууһун уонна бырамыыссыланнай хампаанньалы кытары бииргэ үлэлэһэр наада диэн эттэ. World Skills мэхэнньиисиминэн оробучай каадыры уонна испэсэлиистэри бэлэмниир куурустары тэрийэр, Аартыкаҕа үлэлиир дьону өйүүр социальнай миэрэлэри киллэрэр туһалаах буолуоҕун эттэ.
-
0
-
0
-
0
-
0
-
0
-
0
