Саха-француз оскуолатын сүрүн уратыта -- француз тылын, француз омук култууратын дириҥэтэн үөрэтии.
1996 сыл бэс ыйыгар ЮНЕСКО генеральнай дириэктэрэ Фредерико Майор илии баттааһыннаах, ЮНЕСКО ассоциированнай оскуолаларын кэккэтигэр киирэр туоһу суругун тутан, эппиэтинэс өссө үрдээбитэ, өрөспүүбүлүкэҕэ бастакынан ЮНЕСКО ассоциированнай оскуолата буолбута. Бу олус суолталаах, эппиэтинэстээх үлэ, бастакы хорсун хардыы этэ.
Арассыыйаҕа эрэгийиэннээҕи 9 координационнай киин баар. Олортон “Саха-Байкал” диэни Саха сиринээҕи ЮНЕСКО дьыалаларыгар кэмитиэтин эппиэттиир сэкирэтээрэ Сидорова Елизавета Алексеевна салайбыта. Елизавета Алексеевна Уһук Илин уокурук ЮНЕСКО оскуолаларын координаторынан үлэлиир кэмигэр ЮНЕСКО оскуолаларын үлэлэрин торумнуулларыгар сүбэтэ, өйөбүлэ муҥура суох. Билигин Саха сиригэр барыта холбоон ЮНЕСКО ассоциированнай 24 оскуолата, оҕо уһуйаана баар.
Ассоциированнай оскуолалар ЮНЕСКО сүрүн хайысхаларынан салайтаран үлэлииллэр: тулалыыр эйгэни харыстааһын, чинчийии; оҕо быраабын билии; атын дьоҥҥо, култуураҕа, итэҕэлгэ холку сыһыаннаах, хайдах баарынан ылынар, тулуурдаах (толерантнай) буолуу, демократическай сыаннастары көмүскээһин; туризм, аан дойду култуурунай нэһилиэстибэтин үөрэтии.
Лиссиэй 25 сыллаах үбүлүөйдээх сылын көрсө,бу үөрэх дьылын устата “Диалог на перекрестке культур” диэн тэрээһин ыытылынна. ЮНЕСКО 4 хайысхатын көрдөрөн, улуус, өрөспүүбүлүкэ, Арассыыйа таһымнаах күрэхтэр буоллулар
Улуус оскуолаларын икки ардыларынааҕы “Умники и умницы” өй оонньуута, өрөспүүбүлүкэ оскуолаларын үөрэнээччилэригэр «YAKOUTIA TREVEL HACK-2021» дистанционнай хакатон, Арассыыйа таһымнаах «Расскажи о водоеме своей местности» бэстибээл-аахсыйа уонна “Арассыыйа норуоттарын остуоруйалара” театрализованнай туруоруу, француз омук ырыаларын күрэҕэ ыытылыннылар.
Тэрээһиҥҥэ Арассыыйа 27 эрэгийиэнин ЮНЕСКО оскуолалара кытыннылар.
“Арассыыйа норуоттарын остуоруйалара” күрэхтэһиигэ 14 оҕо кэлэктиибэ саха, татаар, башкир, нанай, нуучча норуоттарын остуоруйаларын туруорбуттарын көрдүбүт.
«Расскажи о водоеме своей местности» аахсыйаҕа Арассыыйа 18 эрэгийиэниттэн 74 оҕо кытынна. Саамай элбэх оҕо Самара уобалаһыттан, Москваттан, Астраханьтан.
Ити курдук, 25 сыллаах үлэни түмэр, саҥа хайысхалары тобулар, инникини торумнанар биир улахан тэрээһин олус көхтөөхтүк, сэргэхтик ааста. Саха-француз лиссиэйин кэлэктиибэ үбүлүөйдээх тэрээһинигэр күүс-көмө, өйөбүл, сүбэһит буолбут Елизавета Алексеевна Сидороваҕа дириҥ махталын тиэрдэр.
Алена Шелковникова
-
0
-
0
-
0
-
0
-
0
-
0
