Ол курдук «Бастыҥ эдэр учуонай» анал аакка 9 киһи кыттыбытыттан кыайыылааҕынан ХИФУ политехническай институтун (филиал) ньиэп-гаас дьыалатын дассыана Кирилл Томскай буолла. Дассыан научнай интэриэһэ киэҥ хабааннаах, туох ханнык иннинэ ньиэп уонна гаас баар сирдэрин көдьүүстээхтик уонна айылҕаны киртиппэт гына туһаныы буолар. Түөрт сыллааҕыта политехническай институт «Таас-Юрях Нефтегазодобыча» диэн хааччахтаммыт эппиэтинэстээх тэрилтэлиин ньиэп-гаас дьыалатыгар хаапыдыра арыйбыттара, ону билигин эдэр дассыан салайар.
«Аккредитацияламмыт лаборатория иһинэн тулалыыр эйгэҕэ техногеннай кэһиилэри анаалыстааһын түмүгэр, биһиги килийиэннэрбит кэккэлэригэр Арассыыйа уонна аан дойду таһымнаах бөдөҥ ньиэп-гаас хостооччулары ыҥырдыбыт. Ол түмүгэр 2021 сылга научнай-чинчийэр үлэҕэ уонна уопуту оҥорууга баһаам элбэх үбүлээһин көрүлүннэ. Итиэннэ ааспыт сылга «Способ очистки отходящих дымовых газов от диоксида серы» диэн научнай чинчийии оҥорорго патент ыллыбыт. Ол чинчийии ньиэп-гаас оҥоруу айылҕаҕа охсубатыгар туһуланара, биһиги кэммитигэр тоҕооһо ордук күүһүрэр», – диэн Кирилл Томскай үллэстэр. Эдэр учуонай анал ааты ылбыта кини докторскай диссертациятын суруйарыгар эбии стимул буоларын бэлиэтиир.
«Бастыҥ аспирант» анал аакка 6 эдэр чинчийээччи кыттыбыт. Куонкурус түмүгүнэн математика уонна информатика институтугар аспирантураҕа 3 сылын үөрэнэр Дмитрий Аммосов кыайда. Эдэр чинчийээччи мультифизичнай уонна мультиконтинуумнай соруктары суоттуурунан интэриэһиргиир. Маны суоттуур улахан прикладной суолталааҕын, көдьүүстээх алгоритмнары толкуйдууру ирдиирин аспирант бэлиэтиир.
Үһүс «Бастыҥ чинчийээччи-устудьуон» анал аат кыайыылааҕынан хотугулуу-илиҥҥи норуоттар тылларын, култуураларын институтун 4 кууруһун устудьуона Игорь Данилов буолла.
Куонкуруска кыттыы кириэтиэрийэ – 2021 сыл устата сурунаалларга научнай ыстатыйа тахсыбыт ахсаана, кэмпириэнсийэлэргэ кыттыы, интеллектуальнай үлэ түмүктэрэ итиэннэ гырааннарга кыайыы. Куонкуруска уопсайа 31 киһи кыттыбыт.
-
0
-
0
-
0
-
0
-
0
-
0
