Тааттаҕа улахан баһаар баарын, нэһилиэнньэлээх пууҥҥа чугаһаабытын туһунан сурах куйаар ситимигэр икки-үс хонуктааҕыта тарҕаммыта. Олохтоохтор хас да миэтирэ үрдүктээх, кытыаста умайар уоту уһулбут видео-устуулара, түһэрбит хаартыскалара тарҕаммыта. Ону кытта “уот Ытык Күөлгэ киирэрэ 2-3 килэмиэтир хаалбыт үһү” диэн сурах тарҕанан саха дьоно бүттүүн айманныбыт.
Бөлүүн, ол эбэтэр атырдьах ыйын 7 күнэ үүнэр түүнүгэр, Бырабыыталыстыба бэрэссэдээтэлин бастакы солбуйааччы Д.Д. Садовников салалталаах 20 киһилээх суһал ыстаап Тааттаҕа көтөн тиийдэ. Сарсыарда 7 чаастан олохтоох эр дьону кытта баһаары утутууга күүстээх үлэ саҕаланна. Чурапчыттан биир тыраахтар, Амматтан, Мэҥэттэн биирдии баһаарынай массыына эбии кэлбит.
Чаас аҥараа өттүгэр “Полярные авиалинии” хампаанньа бөртөлүөтэ уу кутар үлэтин саҕалаата. Өссө биир бөртөлүөт көмөҕө тиийиэхтээх. Уопсайа, икки бөртөлүөт үөһэттэн уу кутуоҕа.
Таатта дьон-сэргэтэ баһаары утары үлэҕэ биир киһи курдук бары күргүөмүнэн туруннулар. Олохтоох урбаанньыттар, атыы-эргиэн эйгэтигэр үлэлиир дьон аһынан, малынан, харчынан көмөлөһө олороллор. Ол курдук, мин билбиппинэн, З.З. Варламов салайааччылаах “Баай Ас” кэпэрэтиип баһаары утары охсуһар байыастар аһылларыгар 65 киилэ эти көмө быһыытынан биэрдэ. Аҕа саастаахтар хуордарын түмсүүтэ (сал. К.И. Христофоров) 20 тыһ. солк. суумалаах бородууктаны тиксэрдэ. “Дьоһун” маҕаһыыннаах урбаанньыт А.Д. Толстякова 80 устуука килиэбинэн хааччыйда. Биирдиилээн олохтоохтор, тэрилтэлэр бородууктанан көмөлөрүн быыстала суох тиксэрэ олороллор. “Кэнчээри” уһуйааҥҥа ас астаан бэлэмнииллэр. Таатта дьоно-сэргэтэ түмсүүлээҕин көрдөрдө.
Атырдьах ыйын 7 күнүгэр күнүс 13 чааска Таатта улууһун баһылыгар М.М. Соровка быһа сибээскэ тахсан баһаар туругун, билиҥҥи балаһыанньаны ыйыталастыбыт.
Михаил Михайлович Соров:
– Улахан уот Ытык Күөлгэ суоһуур. Тыала бэрт буолан уоту тохтоторго хаһыллыбыт балаһаны үрдүнэн көтөн ааста. Баһаар “верховойга” кубулуйан тарҕаныыта лаппа күүһүрэн, түргэтээн биэрдэ. Билигин уоту утары 197 киһи үлэлии сылдьар. Баһаарынай сулууспалар, “Авиалесоохрана” тэрилтэ байыастара уонна бэйэбит нэһилиэктэрбититтэн мустан эр дьон тахсан тураллар. Д.Д. Садовников салалталаах суһал ыстаап күүскэ үлэлиир. Үлэ бөҕө бара турар: таһынааҕы тииттэри охторобут, кэрдэбит, бульдозерынан сири хоруттарабыт, утары уот ыытабыт уо.д.а. Уот нэһилиэнньэлээх пууҥҥа, ол эбэтэр Ытык Күөлгэ, 3-4 км. чугаһаан турар.
Түмүкпэр: “Михаил Михайлович, бэҕэһээ ыкса киэһэ олохтоохтору көһөртөөн (эвакуациялаан) эрэллэр үһү” диэн сурах тарҕаммыта. Ити кырдьык сурах дуо?”, – диэн ыйыттым. Онуоха Михаил Михайлович хоруйа маннык буолла: “Эвакуация биллэриллибэтэҕэ, олохтоохтору атын нэһилиэктэргэ көһөрбөтөхпүт. Арай уот чугаһаабыт сиригэр, нэһилиэк биир кытыытыгар олорооччулары үөс диэки оҕолоругар, аймахтарыгар көһөллөрүгэр эппиппит. Аҕыйах киһи көспүт буолуохтаах”.
Билигин кыстыкка бэлэмнэнэр, от оттонор саамай былдьаһыктаах кэм. Хороҕор муостааҕынан, сыспай сиэллээҕинэн айахтарын ииттинэн олорор саха дьоно барахсаттар уоту кытта охсуһа, буһа-хата, улаханнык ыксаан-ыгылыйан сылдьаллар. Айыыларбыт көмөлөрүнэн барыта этэҥҥэ эрэ буоллун.
Диана Клепандина.
Хаартыскалары @taatta_sitim сирэйтэн туһанныбыт.
-
0
-
0
-
0
-
0
-
0
-
0
