Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников Саха сиригэр баһаартан куттал суох буолуутун хааччыйарга биир кэлим былаана 2020 сылга Ил Дархан Айсен Николаев сорудаҕынан оҥоһуллубутун бэлиэтээбитэ. Эрдэтинэ баһаарынай сэрэтэр тэриллэри туруорууга резервнэй пуондаттан үп-харчы көрүллүбүт эбит буоллаҕына, бу былаан олоххо киириэҕиттэн сыллата өрөспүүбүлүкэ бүддьүөтүттэн социальнай көмүскэлэ суох гражданнар дьиэлэригэр баһаарынай иһитиннэриилэри туруорууга 6 мөл. солк. тахса үп көрүллэр.
2022 сылга «Баһаары сэрэт – АДПИ туруор!» диэн баһаары сэрэтэр хайысхалаах социальнай аахсыйаны олунньу ый 14 күнүттэн Саха Өрөспүүбүлүкэтин нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт саҕалаабыта.
Бу күннэргэ Өймөкөөн улууһун баһылыга Иннокентий Сивцев Уус-Ньараҕа элбэх оҕолоох Гайнутдиновтар дьиэ кэргэттэригэр АДПИ-ни туруордулар. Бу социальнай ахсыйа эстафетатын 27 №-дээх баһаарынай этэрээт начаалынньыгыттан Михаил Андреевтан туппута. Салгыы Иннокентий Семенович эстафетаны улуус уонна нэһилиэк баһылыктарыгар атаарда.
АДПИ (автономный дымовой пожарный извещатель) – кыра да умайыы сибикитэ баар буоллаҕына улахан тыас таһаарар тэрил.
Нам улууһугар улуус баһылыга Юрий Слепцов сорудаҕынан аахсыйа эстафетатын Таастаах нэһилиэгин баһылыга Егор Лиханов Салбаҥ баһылыгар Сахаян Аргуновка туттарбыта.
– Нэһилиэк элбэх оҕолоох ыалыгар уонна соҕотох олорор аҕам саастаах олохтооҕун дьиэлэригэр АДПИ атыылаһан ылан туруордубут. Салгыы үлэ ыытыллар, инникитин тэрилтэ салайааччылара уонна үлэһиттэрэ кыттыһан элбэх кыбартыыралаах уонна кэтэх олорор дьиэлэргэ туруоруохтара. Сыл устата нэһилиэк дьиэтэ барыта АДПИ-лаах буоларын ситиһэргэ сүрүн сыал-сорук турар, - диэн Егор Лиханов социальнай ситимнэргэ суруйар.
Амма улууһугар ОДьХК ГУП Амма филиалын дириэктэрин э.т. Виктор Кузнецов Амма улууһун баһылыгын тутууга уонна инфратструктураны сайыннарыыга солбуйааччыта Виктор Смирновтан аахсыйа эстафетата туттарылынна. Кини элбэх оҕолоох Павловтар дьиэ кэргэттэригэр АДПИ-ны туруорда.
Аахсыйа чэрчитинэн Үөһээ Бүлүү улууһун Кэнтик нэһилиэгин баһылыга Валерий Николаев уонна муниципальнай баһаарынай чаас сулууспатын начаалынньыга Валерий Самсонов көҕүлээһиннэринэн нэһилиэк Сэбиэтин дьокутааттара быһаарыы ылынан, 1995 сылга диэри тутуллубут Кэнтик нэһилиэгин 100 олорор дьиэлэригэр 210 устуука АДПИ-ни (АРТОН-ИПД-3.4М) атыылаһан ылан туруохтара. - Билиҥҥи туругунан АДПИ-нан 20 ыал хааччылынна, салгыы бырааһынньык кэннэ үлэ салҕаныаҕа, - диир Валерий Самсонов.
Санатар буоллахха, «Баһаары сэрэт – АДПИ туруор!» аахсыйа 2021 сылтан саҕаламмыта. Аахсыйаҕа 750 киһи кыттыбыта. Бырайыак чэрчитинэн Саха сиригэр барыта 1850 АДПИ – элбэх оҕолоох ыалларга, соҕотох олорор аҕам саастаах дьоннорго, доруобуйаларынан хааччахтаахтарга уонна уустук балаһыанньаҕа киирбит ыалларга туруорбуттара.
Аахсыйа «2022 сыл - 22 бастыҥ көҕүлээһинэ» бырайыак, САССР төрүттэммитэ 100 сылыгар, ону тэҥэ Саха Өрөспүүбүлүкэтин нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт тэриллибитэ 10 сылыгар уонна Саха сирин баһаартан сэрэтии 205 сылын чэрчилэринэн ыытыллаллар.
- 0
- 0
- 0
- 0
- 0
- 0