От ыйынааҕы дааннайы кытта тэҥнээтэххэ, ойуур баһаарын ахсаана үс төгүл намтаата. Оччолорго 314 ойуур баһаара турбута биллэрэ, бүгүн - 92. Нэһилиэнньэлээх пууннарга уонна экэниэмиэкэ эбийиэктэригэр быһаччы куттал суох. Бу туһунан, бүгүн, өрөспүүбүлүкэтээҕи Суһал ыстаабын сарсыардааҥы уочараттаах мунньаҕар СӨ Ил Дархана Айсен Николаев иһитиннэрдэ.
Павел Гарин, РФ Гражданскай оборуона дьыалаларыгар, ыксаллаах быһыы-майгы уонна айылҕа алдьархайын туоратыыга министиэристибэтин Саха сиринээҕи управлениетын начаалынньыга:
- Билиҥҥи туругунан, нэһилиэнньэлээх пууннарга чугаһаабыт ойуур баһаара суох. Саха сирин 10 улууһугар уот умуруорууга ордук көхтөөх үлэ ыытыллар. Нэһилиэнньэлээх пууннартан 10-ча км тэйиччи ыраах сиргэ 7 айылҕа баһаара баара биллэр, олортон 3-һэ умуруорулунна. Ойуур баһаарын умуруорууга 3014 киһи уонна 514 тиэхиньикэ, ол иһигэр 25 салгын аала тардылынна. Ааспыт сууккаҕа 17 салгын аалынан баһаары умуруорууга 546 туонна уу кутулунна. Бүгүн «Бе-200» салгын ааллара Уус-Майа улууһун Эльдикан уонна Томпо улууһун Хаандыга бөһүөлэктэригэр үлэлиэхтэрэ.
Уус-Майа, Хаҥалас уонна Чурапчы улуустарыгар тыҥааһыннаах ыксаллаах быһыы-майгы балаһыанньата оннунан хаалар, ЫБМ исписэлиистэрэ салгыы үлэлэрин ыыталлар. Күн-дьыл туругун көрөн, ЫБМ авиациятын Күпсү, Эльдикан, Эдьигээн, Эргэлээх, Хаандыга уонна «Өлүөнэ очуостара» айылҕа пааркатын эргин туһаналлара былааннанар.
Ордук уустук балаһыанньа Уус-Майа улууһугар бэлиэтэнэр. Билигин бу улууска 15 ойуур баһаара турар. Айсен Николаев Уус-Майа улууһугар үлэни күүһүрдэллэригэр сорудахтаата. Бүгүн Уус-Майаҕа РФ Гражданскай оборуона дьыалаларыгар, ыксаллаах быһыы-майгы уонна айылҕа алдьархайын туоратыыга миниистири бастакы солбуйааччыта Александр Чуприян айаннаата.
-Сүрүн сорукпут - кылгас кэм иһигэр уоту бохсор наадалаах. Аны ойуур баһаарын умуруорууну уһаппатар ордук. Ол кэннэ бары күүһү атын, онтон ураты кутталлаах учаастактарга көһөрүөхпүт. Оройуоннарынан ыксаллаах быһыы-майгы эрэсиимин уһулар былааннаммат. Өрөспүүбүлүкэҕэ эрэгийиэннэр икки ардыларынааҕы ыксаллаах быһыы-майгы эрэсиимэ тутуһуллар. Бу эрэсиими уһулар сыалтан баһаардары умуруорууга ылбыт үчүгэй тэтими салгыы тутуһуохтаахпыт, - диэтэ өрөспүүбүлүкэ салайааччыта.
-
0
-
0
-
0
-
0
-
0
-
0
