Ол курдук, 72 баһаары умуруоруугү үлэ ыытыллар, 4097 киһи уонна 584 тиэхиньикэ кыттар. Сууккаҕа 3 баһаары умуруорбуттар, 8 баһаары төгүрүппүттэр, эбии 4 уот туочуката үөскээбит.
РФ ЫБМ икки Ми-8 бөртөлүөтэ Кэбээйи улууһун Кальвица уонна Таатта улууһун Ытык Күөл бөһүөлэктэрин таһыгар турбут баһаары умулларыыга үлэлииллэр.
«Баһаарынайдар уонна олохтоох дьон көмөлөрүнэн күүстээх уот турбут учаастактарыгар уот тэнийиитин тохтоттубут, ол эрээри тыалтан сылтаан куттал син биир баар. Тыал Бүлүү бөлөх улуустарын диэки барда, онон бу күннэргэ ол сирдэргэ биригээдэлэри уонна тиэхиньикэни күүһүрдүөхпүт», -- диэн Дмитрий Садовников эттэ.
Бүгүн өрөспүүбүлүкэҕэ Тюмень уобалаһын уонна Ханты-Мансийскай уокуругун Авиалесохранатын 50 парашут-десантнига көмөҕө кэллэ. Аллараа Бэстээххэ тимир суолунан РФ Оборуонаҕа министиэристибэтин тиэхиньикэтин аҕаллылар.
Бүгүҥҥү туругунан Кэбээйи улууһун Сангар, Кальвица, Ситтэ, Горнай улууһан Бэс Күөл, Нам улууһун Харыйалаах, Үөһээ Бүлүү Кырыкый уонна Хомустаах, Таатта улууһун Ытык Күөл, Уус Алдан улууһун Түүлээх уонна Томпо улууһун Ударник сэлиэнньэлэрин таһыгар турбут ойуур баһаардара улахан хонтуруолга тутуллаллар.
- 0
- 0
- 0
- 0
- 0
- 0