Мунньаҕы “Биир ньыгыл Арассыыйа” фракция бэрэстэбиитэлэ Валентина Терешкова арыйда. Итиэннэ Судаарыстыбаннай Дуумаҕа ааспыт политическай баартыйалар бэрэстэбиитэллэрэ тыл эттилэр. Суоттуур хамыыһыйаны, СД быстах уорганнарын талыыга, дьокутааттар күһүҥҥү сиэссийэҕэ үлэлэрин бэрээдэгэр уларытыылары киллэриигэ боппуруостар көрүлүннүлэр,
Сүрүн сонунтан сырдатар буоллахха, Судаарыстыбаннай Дуума дьокутааттарын VIII ыҥырыылаах мунньаҕын бэрэссэдээтэлинэн Вячеслав Володин талылынна. Кини туһугар 5 фракцияттан 4-дэ куоластаата. Судаарыстыбаннай Дуумаҕа 5 фракция регистрацияланна – “Биир ньыгыл Арассыыйа”, “РФ Коммунистическай баартыйата”, “Арассыыйа либеральнай-демократическай баартыйата”, “Сиэрдээх Арассыыйа – Кырдьык иһин”, “Саҥа дьон”.
Бэлиэтиир буоллахха, Саха сириттэн талыллыбыт дьокутааттар дуума 4 кэмитиэтигэр киириэхтэрэ. Галина Данчикова ааспыттааҥҥы курдук бүддьүөт уонна нолуок кэмитиэтигэр үлэлиэ. Федот Тумусов эмиэ доруобуйа харыстабылын кэмитиэтигэр хаалла. Сардаана Авксентьева эригийиэн бэлиитикэтин уонна олохтоох бэйэни салайыныы кэмитиэтигэр киирдэ. Петр Аммосов тыраанспары уонна тыраанспар инфраструктуратын сайыннарыы кэмитиэтигэр үлэлиэ.
Биир мандааттаах Забайкалье уокуругуттан Суударыстыбаннай Дуумаҕа быыбарга кыайбыт саха парламенын дьокутаата Юрий Григорьев экология, айылҕа баайа уонна тулалыыр эйгэ харыстабылын кэмитиэтигэр киирбит.
Сиһилии бу сигэнэн киирэн ааҕыҥ http://duma.gov.ru/news/52402/
-
0
-
0
-
0
-
0
-
0
-
0
