Парламентарий Андрей Находкин «Об ответственном обращении с животными» диэн Федеральнай сокуон Судаарыстыбаннай дууманан 2018 сыллаахха ахсынньы 19 күнүгэр ылыллыбытын санатта. Кини этэринэн, 2019 көһүү сылынан буолбут, 2020 сылтан РФ бары эрэгийиэннэригэр сокуон үлэлээн саҕалаабыт.
«Саха сиригэр бу сокуон киириитин тута көрбүппүт, чинчийбиппит уонна эрэгийиэммит уратытын учуоттаабат сөп түбэһиспэт түгэннэрин булбуппут. Биһиги үлэлиир бөлөх тэрийбиппит уонна сокуоҥҥа уларытыылары киллэриигэ үлэбитин саҕалаабыппыт. Элбэх көрсүһүү, сүбэлэһии буолбута. Оройуоннар үксүлэрэ, ол иһигэр Дьокуускай куорат, итиэннэ уопсастыбанньыктар этиилэрин киллэрбиттэрэ. Ону тэҥэ СӨ Бырабыыталыстыбатын, бэтэринэриийэ дьыпартааманын, норуот дьокутааттарын кытта ыкса үлэлээтибит. Үлэбит түмүгүнэн «О внесении изменений в Федеральный закон «Об ответственном обращении с животными» диэн сокуон барылын оҥоруу уонна кэккэ сокуон аахталарыгар уларытыылары киллэрии», - диэтэ Находкин.
Норуот дьокутаата бэлиэтииринэн, билигин үлэлиир сокуон ыты тутарга, эпэрээссийэлээн төрөөбөт оҥорорго, быһыыны биэрэргэ уонна урукку туппут сирдэригэр ыытарга туһуламмыт.
«Биһиэхэ икки сүрүн уларытыылаахпыт. Ити сокуон үһүс ыстатыйатыгар бэйдиэ кыыллары гуманнай ньыманан РФ иһигэр бигэргэтиллибит анал бэтэринээринэй препараттарынан өлөрөр туһунан этиилээхпит. Иккис уларытыыбыт – сокуонтан ыты туппут сирдэригэр төнүннэрии туһунан пууну таһаарыы. Тоҕо диэтэр, хаһаайына суох ыытыллыбыт ыттар син биир ыт үөрүгэр киирэр уонна дьоҥҥо түһэр. Кыһыммыт олус тымныы уонна тыйыс, ол иһин ыттар буурса адьырҕатыйаллар. Биир ыт – киһи доҕоро. Оттон бэйдиэ сылдьар ыт үөрэ – уопсастыбаҕа кутталлаах, биһиги ону өйдүөх тустаахпыт», - диэн кэмитиэт бэрэссэдээтэлэ ырытар.
Андрей Находкин уопсастыба уонна ыт хаһаайыттара кыылга эппиэтинэс сүгэллэрин тоһоҕолуур.
«Саҥа дьыл өрөбүллэригэр өссө төгүл сокуон барылын чочуйуохпут. Саҥа дьыл кэннэ кэмитиэтинэн мустуохпут уонна Ил Түмэн тохсунньу 17 күнүнээҕи пленарнай мунньаҕын бэбиэскэтигэр докумуону киллэттэриэхпит. Ол кэнниттэн тустаах үлэлэр барыахтара. Биһиги этиибитин Судаарыстыбаннай дуума дьокутааттара истиэхтэрэ диэн эрэнэбит. Сокуоммут барылын Судаарыстыбаннай дуума дьокутаатыгар Галина Данчиковаҕа федеральнай таһымҥа үлэ барарын туһугар номнуо ыыппыппыт», – диэн Андрей Находкин этиитин түмүктүүр.
-
0
-
0
-
0
-
0
-
0
-
0
