Отчуот «Арассыыйа Федерациятын субъектарын судаарыстыбаннай былаастарын сокуону таһаарар (бэрэстэбиитэллээх) уонна сокуону таһаарар былаастарын уорганын тэрийии сүрүн бириинсиптэрин туһунан» федеральнай сокуон 7-с пуунун 1в ыстатыйатыгар, итиэннэ «Саха Өрөспүүбүлүкэтин Баһылыгын туһунан» өрөспүүбүүлүкэтээҕи сокуон 8-с пуунун 4.1 ыстатыйатыгар олоҕуран оҥоһуллар.
– Бу уустук кэмнэргэ бары бииргэ түмсэммит, дойдубутугар үтүө туруктаах уонна киэҥ-холку олоҕу хааччыйар туһугар туох кыалларын барытын оҥоруохпут, -- диэтэ Ил Дархан түмүгэр уонна сис кэмитиэттэр, фракциялар отчуоту сиэрдээхтик дьүүллэспиттэрин иһин махталын биллэрдэ, киирбит этиилэр кэлэр өттүгэр учуоттаныахтарын эттэ.
Ыйытыы көхтөөх буолла. Урбаан, туризм уонна инфраструктураны сайыннарыы сис кэмитиэтин бэрэссэдээтэлэ Игорь Григорьев эһиил Ил Түмэн быыбарыгар Дьокуускай куорат уокуруктарга хайдах араарылларын, оройуоннааҕы сэбиэттэри баартыйа ситиминэн таҥар хайдах буолуоҕун ыйытта. Онуоха Ил Дархан: “Киин куорат нэһилиэнньэтин ахсаана элбээн, икки быыбардыыр уокурук эбиллиэ, парламеҥҥа, урукку курдук, 70 дьокутаат (35 дьокутаат биир мандааттаах уокуруктан, 35 дьокутаат баартыйа испииһэгинэн) талыллыаҕа, оттон оройуоннааҕы сэбиэттэр дьокутааттарын хайдах талары муниципалитеттар бэйэлэрэ быһаарыахтара”, -- диэтэ.
Норуот дьокутаата Евгений Кожухов тыа хаһаайыстыбатын сайдыытын тосхоллорун туоһулаһан, толору харданы ылла. Мандаат уонна регламент хамыыһыйатын сис кэмитиэтин бэрэссэдээтэлэ Андрей Дорогань сыл түмүгүнэн ылыллыбыт профицит туохха туттулларын ыйыппытыгар, ити харчы инвест-бырагыраамалары, социальнай эйгэни үбүлээһиҥҥэ, хамнаһы, босуобуйалары үрдэтиигэ, «Үйэ оҕолоро» хапытаалга туһаныллара быһаарылынна. Норуот дьокутаата Ньургуйаана Захарова нэһилиэнньэ дохуотун уонна тиийинэн олоруу алын таһымын үрдэтиигэ былааннанар дьаһаллар тустарынан сураста.
– Дьадайыыны утары охсуһуу судаарыстыба бэлиитикэтин чорботор соруга буолар, – диэтэ Айсен Николаев. – Бу хайысханан үлэ утумнаахтык ыытылларын түмүгэр, кэлиҥҥи сылларга дьадайыы таһыма 3 %-ынан намтатыллара ситиһилиннэ. Нэһилиэнньэ дьарыктаах буолуутугар, граннарга, бырагыраамаларга уонна социальнай хантараак курдук федеральнай өйөбүлгэ тирэҕирэн, тыа сиригэр үлэ-хамнас саҥа көрүҥнэрин тэрийии, элбэх оҕолоох ыалларга, инбэлииттэргэ көмөлөһүү барыта ити сыалга туһаайыллар.
Тыл эппит дьокутааттар отчуоту өйүүллэрин биллэрдилэр. Вице-спикер Виктор Губарев Аартыканы уонна хотугу улуустары аһынан-үөлүнэн хааччыйыы 85 %-ын урбаанньыттар быһааралларын санатан, үп көрүллүүтүн үрдэтэргэ эттэ. Анатолий Николаев пандемияҕа кураан уонна ойуур баһаардара мэҥэһик буолбут кэмнэригэр уталыппакка сөптөөх дьаһаллар ылылланнар, барыта этэҥҥэ быһаарыллан, сыл түмүгүнэн бүддьүөт дохуота ороскуоту 33,2 миллиард солкуобайынан куоһарбытын үрдүктүк сыаналаата, социальнай хайысхалаах бырагыраамалары сэргэ наукаҕа, инновацияҕа болҕомтону уурарга эттэ.
Хаартыскаҕа Василий Кононов (Ил Түмэн) түһэриитэ
-
0
-
0
-
0
-
0
-
0
-
0
