Дакылааты оҥорбут Бырабыыталыстыба бэрэссэдээтэлин солбуйааччы Сергей Местников этэринэн, өрөспүүбүлүкэ үрдүнэн дьоҕус кэмпилиэктээх 204 оскуола, 30 уһуйаан баар. Сокуон барылын быһыытынан, дьоҕус киэптээх иитэр-үөрэтэр тэрилтэлэр федеральнай статистика ирдэбилинэн быһаарыллыахтаахтар. Оччотугар, бу кэрискэҕэ 238 оскуола, 28 уһуйаан киллэриллиэхтээх. Онуоха уһуйааҥҥа 28 иитиллээччи, алын сүһүөх оскуолаҕа 38, ситэтэ суох орто оскуолаҕа 85, орто оскуолаҕа 104 үөрэнээччи баар буолара ирдэнэр эбит.
Норуот дьокутааттара элбэх ыйытыылары биэрдилэр. Дьоҕус кэмпилиэктээх оскуола биһиги уратыбыт буоларын, кытыы нэһилиэктэр маннык оскуолалар баар буоланнар тыыннаахтарын, оҕо ахсаанын мыынан, оскуола сабылынна да, нэһилиэк эмиэ эстэрин эттилэр. Онон дьоҕус киэптээх оскуолаларга, хамнаһы көрүүттэн саҕалаан (эдэр учуутал хамнаһа тиийинэн олоруу алын таһымыттан намыһах!) өйөбүл наада диэтилэр. Быһаарар суолтаны вице-спикер Александр Жирков этиитэ ылла:
-- Дьоҕус кэмпилиэктээх оскуола туһунан өйдөбүлү дойдуга бастакынан киллэрэн, сокуонунан бигэргэттэрэн бараммыт, билигин кэлэн чугуйарбыт табыллыбат. Барылы Бырабыыталыстыбаҕа төттөрү ыытыахха, ситэрдиннэр. Дьоҕус кэмпилиэктээх оскуола киритиэрийин норуот дьокутааттара оҥорон, Бырабыыталыстыбаҕа бигэргэтиигэ биэриэхтээхпит уонна онон хонтуруоллуохтаахпыт, оттон Үөрэх министиэристибэтэ иитэр-үөрэтэр үлэни хааччыйыахтаах.
-
2
-
0
-
0
-
0
-
0
-
0
