Мунньахха өрөспүүбүлүкэ министэристибэлэрин уонна биэдэмистибэлэрин бэрэстэбиитэллэрэ кыттыннылар. СӨ Үөрэххэ уонна наукаҕа миниистирин бастакы солбуйааччыта Алевтина Аргунова саха тылын, литературатын уонна төрүт култууратын учууталларын II өрөспүүбүлүкэтээҕи сийиэһигэр киирбит биэс сүрүн этиилэр туһунан кэпсээтэ: ийэ тылга уопсай тэрээһиннэр; каадырдары бэлэмнээһин; үөрэх уонна иитии хаачыстыбата; бырайыактар; ийэ тылы кытта сибээстээх үлэ хаачыстыбата.
Ил Түмэн Наукаҕа, үөрэххэ, култуураҕа уонна уопсастыбаннай тэрилтэлэр дьыалаларыгар сис кэмитиэтин бэрссэдээтэлэ Феодосия Габышева сийиэс сыалын иһитиннэрдэ: ФГОС саҥардыллыбыт усулуобуйатыгар үөрэх, таба суруйуу хаачыстыбатын үрдэтии; саха тылын учууталын престиһин үрдэтии; төрөөбүт тыл эйгэтин кэҥэтэргэ бары кыахтары түмүү.
СӨ Аҕа баһылыгын уонна Бырабыыталыстыбатын дьаһалтатын иһинэн тыллары сайыннарыы боппуруостарыгар салалта салайааччыта Римма Жиркова СӨ Аҕа баһылыгын иһинэн тыл сайдыытыгар Сэбиэт киэҥ ыҥырыылаах мунньаҕын түмүктэрин билиһиннэрдэ. СӨ Тас сибээскэ уонна норуоттар дьыалаларыгар миниистирин солбуйааччыта Татьяна Пяткина «2020-2024 сылларга Саха Сиригэр судаарыстыбаннай уонна официальнай тыллары харыстааһыҥҥа уонна сайыннарыыга» судаарыстыбаннай бырагыраама чэрчитинэн ыытыллыбыт бырайыактар түмүктэрин билиһиннэрдэ. СӨ Аартыка уонна Хотугу норуоттар дьыалаларыгар миниистирин солбуйааччыта Михаил Погодаев Хотугу сир төрүт олохтоох аҕыйах ахсааннаах норуоттарын официальнай тылларыгар сыһыаннаах ыытыллыбыт дьаһаллар тустарынан иһитиннэрдэ.
Мунньах түмүгэр Ил Түмэн спикерэ Александр Жирков саха тылын, литературатын уонна төрүт култууратын учууталларын II өрөспүүбүлүкэтээҕи сийиэһин түмүк докумуонун тустаах министиэристибэлэри кытта сөбүлэһиннэриигэ нуучча тылынан суруллуохтааҕа наадатын бэлиэтээтэ. Онтон бигэргэтиллибит докумуон саха тылыгар тылбаастаныаҕа. Парламентарий Саха Сиригэр тылы сайыннарыыга, саҥардыыга уонна тупсарыыга үлэ саҕаламмытын, ону тэҥэ өссө да элбэх үлэ оҥоһуллуохтааҕын чопчулаата. Манан сибээстээн, кини СӨ Үөрэххэ уонна наукаҕа министиэристибэтигэр туруоруллубут соруктары олоххо киллэриини хонтуруоллуур үлэһиттэр бөлөҕүн тэрийэргэ сорудахтаата. Онно министэристибэлэр, биэдэмистибэлэр уонна уопсастыбаннай тэрилтэлэр бэрэстэбиитэллэрэ киириэхтэрэ.
Салгыы Александр Николаевич саха тылын, литературатын уонна култууратын үөрэтии кэнсиэпсийэтин торумнаан, Хотугу сир төрүт олохтоох аҕыйах ахсааннаах норуоттарын тылларыгар анаан туспа түһүмэхтэри тэрийиэххэ наадатын, федеральнай сокуоҥҥа Хотугу сир төрүт олохтоох аҕыйах ахсааннаах норуоттарын тылларын үөрэтиини араарылларын туһунан кэпсээтэ. Кини оскуолаҕа киириэн иннинээҕи саастаах оҕолорго уонна ыччакка тыл эйгэтин тэрийиигэ ураты болҕомтотун уурда. Ити туһугар кини саха тылын үөрэх тэрилтэлэригэр саха тылын IT-эйгэҕэ үөрэтииттэн саҕалаан, хас биирдии оскуолаларга тиийэ киллэриигэ бары кыахтары туһанарга этии киллэрдэ. Александр Жирков түмүктүүр докумуон толоруутун хаамыыта салгыы дьүүллэһиллэрин уонна хонтуруолланарын иһитиннэрдэ.
-
3
-
0
-
0
-
0
-
0
-
1
