Тэрээһиҥҥэ Бүлүү улууһун оскуолаларын, уһуйааннарын үлэһиттэрэ, уопсастыбаннай түмсүүлэр салайааччылара, төрөппүттэр кытыннылар. «Төгүрүк остуолу» социальнай уонна ыччат бэлиитикэтигэр баһылыгы солбуйааччы Александр Игоревич Комаров ыытта.
Мустубут дьон «төгүрүк остуол» тула олорон, төрөөбүт тыл суолтатын, оҕолор олохторугар оруолун туһунан кэпсэттилэр, санаа атастастылар. Көрсүһүү кэмигэр декада түмүктэрэ, төрөөбүт тылы сайыннарыыга ыытыллыбыт суолталаах тэрээһиннэр уонна практикалар бэлиэтэннилэр.
Кыттааччылар болҕомтолорун ыччат ортотугар саха тылын харыстааһын боппуруоһугар уурдулар. Бүтэһик сылларга ыччат ортотугар төрөөбүт тылынан саҥарар таһым аччаан иһэрэ бэлиэтэннэ. «Төгүрүк остуол» кыттыылаахтара бу боппуруоһу быһаарыы суолларын ырытыстылар, ол иһигэр төрөөбүт тылынан ааҕыыны тарҕатыы үлэтин күүһүрдүү, үөрэх тэрилтэлэригэр тыл практикатын кэҥэтии уонна эбии култуурунай-сырдатар тэрээһиннэри ыытыы.
Кинигэни ааҕыы, ырытыы, ис хоһоонун өйдөөһүн — бу барыта тылы харыстааһыҥҥа, сайыннарыыга, оҕону төрүт үгэстэринэн иитиигэ улахан олук буолар диэн санааттан Бүлүүтээҕи үөрэҕирии салаата 2026 сылы «Ааҕар сыл» диэн биллэрдэ. Дьиэ кэргэн, үөрэх ситимэ сомоҕолоһон үлэлэстэхтэринэ эрэ төрөөбүт тылбыт сүтүө, симэлийиэ суоҕа. Онон бу барыбыт уопсай сорукпут буолара саарбаҕа суох.
Василина Татаринова, "Олох суола".
-
0
-
0
-
0
-
0
-
0
-
0
