Көрсүһүү кэмигэр ыстаап салайааччыта Георгий Куркутов уонна Донбаһы өйүүр пуонда салайааччыта Михаил Павлов үлэлэр уонна инники соруктар тустарынан кэпсээтилэр. Кинилэр Координационнай кииҥҥэ бары өттүнэн көмөнү оҥоруу матырыйаалынай уонна социальнай хайысхаларынан барарын туһунан кэпсээтилэр.
Хас биирдии муниципальнай тэриллиилэринэн уонна куорат уокуруктарынан нэһилиэк баһылыктарын уонна социальнай боппуруостарга солбуйааччыларын кытта салайааччылардаах көмө оҥорууга уопсайа 51 бөлөх тэриллибит. Оройуоннааҕы бөлөхтөрүнэн 4000 кэриҥэ байыаннай сулууспалаахтар дьиэ кэргэттэрэ хабыллаллар.
Матырыйаалынай өттүнэн көмөнү оҥорууга өрөспүүбүлүкэ үрдүнэн 955 мөл. солк. үп-харчы тиэрдиллибит, ол иһигэр резервнэй пуондаттан — 565 мөл. солк., муниципальнай тэриллиилэринэн — 389 мөл. солк.
Ону тэҥэ, байыаннай зонаҕа 36 тиэхиникэ, 153 пилота суох көтөр аппарааттар, 751 тепловизор уонна түүҥҥү өттүгэр көрөр прибордар, 1425 сибээс тиэхиникэтэ, 87 электрогенератор, 79 оттук тэриллэрэ, о.д.а. тиэхиникэ уонна мэдиссиинэ сириэстибэлэрэ ыытыллыбыттар. Былырыын «Боотур» этэрээт 150 буойуттарыгар анал байыаннай үөрэх куурустара тэриллибиттэр. Быйыл 360 киһи үөрэнэрэ былааннанар.
Көрсүһүү кэмигэр ыстаап салайааччыта байыаннай сулууспалаахтарга көмөнү оҥоруу аныгыс долгунугар эбии үп-харчы хомуйуллара наадатын туһунан иһитиннэрдэ. Норуот дьокутааттара бары өттүнэн көмөнү оҥорорго бэлэмнэрин биллэрдилэр.
— Парламент бэлитиичэскэй баартыйаларын фракциялара бары күүстэрин түмэргэ уонна нуормалыыр-быраап докумуоннарын оҥорорго бэлэмнэр, — диэтэ парламент спикерэ Алексей Еремеев.
-
0
-
0
-
0
-
0
-
0
-
0
