Бэрт сотору олунньу буолуо, ону кытта олунньу 23 күнүн эр дьон күннэрин ылыахпыт. Салгыы ону тилэх баттаһа кулун тутарга аан дойдутааҕы дьахталлар күннэрин бу бэлиэтии сылдьар буолуохпут. Биирдэ өйдөммүммүт муус устарга үктэнэн, чалбаҕы үрдүнэн ойуоккалыы сылдьыахпыт. Ыам ыйын 1 күнэ -- Күөх Маа -- бырааһынньыга буолуоҕа. Ити саҕана хамсыкпыт хаптайан параадтыырбыт эбитэ дуу, суоҕа дуу? Салгыы ыам ыйын 9 күнэ буолан, Улуу Кыайыы өрөгөйдөөх күнүн бэлиэтиэхпит. Этэҥҥэ бэс ыйыгар үктэнэн, улуу тунах ыһыахтар саҕаланыахтара. От ыйын өҥөрүк куйаастара туран, «Сайын биир күнэ -- дьылы аһатар” диэнинэн салайтаран, тыа сирин дьоно бары окко киириэхтэрэ... Дьэ ити курдук үлэ-хамнас, араас тэрээһиннэр тохтообокко бара туруохтара турдаҕа. Бээ, суруйуохтаах сыалбыттан-сорукпуттан арыый да халыйбыт эбиппин.
Биэс күннээҕитэ Саҥа дьылы ылан, үөрэ-көтө бырааһынньыктаабыппыт. Уһун күннээх өрөбүлбүт ортолообут. Үгүспүт Саҥа дьыллааҕы остуолтан хаалбыт аһы-үөлү санаан кэлэ-кэлэ, ону кээрэтэ сатыыр, бэйэ-бэйэбитигэр ыалдьыттаһабыт, «күөх экраҥҥа» буолар араас киинэлэри, биэриилэрэ өрө мыҥаан баран олоробут, араас хабааннаах лотереялар буолалларын кэтиибит. Массыыналары, араас сыаналаах бириистэри сүүйбүттэр ааттара бассаап устун тарҕанарын ымсыыра ааҕабыт, үөрэбит-көтөбүт. Салгыы норуот дьокутааттара бу күннэргэ тугунан дьарыктана сылдьалларын билсиэххэйиҥ.
Доруобуйабытын бөҕөргөтүнэбит
Федот Тумусов, РФ Госдуматын дьокутаата:
- Москва аттыгар баар санаторийга сынньанарга диэн кэргэмминээн путевка атыыласпыппыт. Хамсык ыарыы кэнниттэн доруобуйабыт туругун бөҕөргөтүнэбит. Төһө кыалларынан, сибиэһэй салгыҥҥа тахсан, хаама сатыыбыт. Бэҕэһээ 8 км курдугу хаамтыбыт. Итини тэҥэ, элбэхтик ааҕабыт, суруйабыт. Түгэнинэн туһанан, Саха сирин олохтоохторун саҥа сылга үктэммиппитинэн эҕэрдэлиибин! Дьаҥ-дьаһах ырааҕынан тумуннун, үөрүү-көтүү эрэ аргыстастын!
Тыс имитэн этэрбэс тигиэм
Елена Голомарева, норуот дьокутаата:
- Саҥа дьыл уһун өрөбүллэрэ дьиэ кэргэни кытта күнү-дьылы атаарарга саамай тоҕоостоох кэмнэр. Иккиһинэн, тымныыта да бэрт, киһи ханна да барбат-кэлбэт бириэмэтэ. Пандемия да уостара ыраах, онон онно-манна сылдьартан туттунуохха наада.
Иистэниэхпин олус баҕардым. Ийэм барахсан хоту дойду дьахтара тыһы, тириини имитэр буолуохтаах диэччи. Өлөөнтөн дьүөгэм кэлбитэ, тыс аҕалбыт. Ону имитэн, тигэн бүтэрбит киһи диэн сыал туруоруннум. Бэйэ тигиитин хаачыстыбата үчүгэй буолара чуолкай. Тыстары өбүгэлэрбит ньымаларынан мас эмэҕинэн имитиэм. Ийэм барахсан иҥнэтин тыаһа сырдырҕаан олорооччу.
Толору үлэлии сылдьабын
Феодосия Габышева, норуот дьокутаата:
- Син биир толору үлэлии сылдьабын. 2021 сыллааҕы үлэм сүрүн соруктарбын чопчулаатым. Ил Дархан Айсен Николаев Анал этиитигэр олоҕуран, оҕо тэрилтэлэрин мэдиссиинэ үлэhиттэринэн тус сыаллаах хааччыйыыга, култуура уонна профессиональнай үөрэх кыhаларын кытта креативнай индустрия уонна култуура хайысхаларынан кэлим бырайыактары олоххо киллэриигэ, Хотугу форум уонна Аартыка сэбиэтин таhымынан баар бырайыактары (үөрэх, тыл, култуура, инновация хайысхаларынан) уонна дойду таhымыгар «Аартыка оҕолоро» бырагырааманы олоххо киллэриигэ күүскэ ылсан үлэлииргэ сыал-сорук туруоруннум. Итини тэҥэ, «О статусе педагога», «Сельская школа», «О памятниках культуры и архитектуры», «О национальных СМИ» диэн өрөспүүбүлүкэтээҕи ураты сокуоннары ылыныыга ылсарга былааннанным.
Бу күннэргэ кыра ыстатыйалар хомуурунньуктарын оҥорон бүтэрдибит. Бэҕэһээ «Новая школа» диэн сүрүн баартыйа бырайыагын ырытан былаанын оҥордум. Инвестиционнай бырагыраама бырайыактарыгар этиилэрбин кэккэ улуустары кытта ырыттыбыт.
Тохсунньу 6-10 күннэригэр быыбардыыр уокурукпар Үөһээ Бүлүүгэ үлэлиэм, быыбардааччыларбын кытта көрсөн кэпсэтиэм.
Бүгүн Бэдьимэҕэ сылдьан, сыах үлэтин билистим
Андрей Находкин, норуот дьокутаата:
-Үүммүт саҥа сылынан итиитик-истиҥник эҕэрдэлиибин! Үүммүт сылтан үчүгэй уларыйыылары эрэ күүтэбин. Үгэс быһыытынан, тохсунньу 1 күнүгэр түүн 13 чааска Комсомольскай болуоссакка Майа олохтоохторун эҕэрдэлээбиппит, Саҥа дьыллааҕы салюту уруйдаабыппыт. Сэрэхтээх буолууну тутуһан уонна тымныы буолан, дьон-сэргэ урукку курдук элбэҕэ суох этилэрэ.
Дьиэ кэргэммин кытта уһун өрөбүллэргэ арааһынай киинэлэри көрөбүт, ол эмиэ элбэх сыллаах үтүө үгэспит буолар. Майа алааһыгар табаарыспын кытта хаалыктаах хаамабын. Бүгүн Бэдьимэ нэһилиэгэр баран, саҥа аһыллан эрэр переработка сыаҕын көрдүм-билистим. Ил Дархаммыт быйылгы сылтан киллэрбит тыа хаһаайыстыбатын өйүүр саҥа механизмнара нэһилиэккэ хайдах киириэхтээҕин туһунан переработка киинин салайааччыта Иван Аргунову кытта кэпсэттибит. Бу хаалбыт өрөбүл күннэргэ эмиэ кэккэ былааннар бааллар, бириэмэни халтай ыыппат курдук. Ол эрээри өрөбүл күннэр түргэнник ааһаллар, иннибитигэр элбэх үлэ күүтэр.
Күн аайы сүүрэбин
Михаил Эверстов, норуот дьокутаата:
- Саҥа дьыл кэнниттэн күн аайы сүүрэбин, ол доруобуйаҕа туһалааҕа чуолкай. Тохсунньу 3 күнүгэр бииргэ үлэлии сылдьар дьокутааттары кытта көрсөн, сонуммутун үллэстибиппит, инники үлэбитин былааннаабыппыт. Сарсын дойдубар Кэбээйигэ барабын, ол баран иһэн суол-иис туругун көрүөм-истиэм. Түгэнинэн туһанан, Саха сирин ытык-мааны олохтоохторун саргылаах Саҥа дьыл салаллан кэлбитинэн эҕэрдэлиибин! Барыгытыгар дьолу-соргуну уонна, саамай сүрүнэ, доруобуйаны баҕарабын!
Мырааҥҥа тахсан дьаарбайабын
Павел Ксенофонтов – Ойуур Байбал, норуот дьокутаата:
- Дьыл оройо буолбутунан уонна саҥа сыл саҕаламмытынан барыгытын эҕэрдэлиибин! Тохсунньу 2 күнүттэн күн аайы 4-5 км сүүрэбин. Таһырдьа тахсан мырааҥҥа дьаарбайабын, салгын сиибин. Ол быыһыгар үстэ-түөртэ мунньахтаатыбыт. Бүгүн итэҕэл сүбэтин мунньаҕын ыытыам. Сарсын, тохсунньу 6 күнүгэр, уолум күн сирин көрбүт күнэ, ону бэлиэтиэхпит. Тохсунньу 7 күнүгэр үлэбэр тахсабын.
Уһанабын
Гаврил Корякин, Бүлүү улууһун дьокутааттарын сэбиэтин бэрэссэдээтэлэ:
- Саҥа дьылынан Саха сирин ытык-мааны олохтоохторун ис сүрэхпиттэн эҕэрдэлиибин. Уһун өрөбүллэргэ дьиэ кэргэммин кытта күнү-дьылы атаара сылдьабын, дьиэ таһыгар ол-бу кыра, иирбэ-таарба үлэ элбэх. Бүгүн гарааспар кыратык уһанарга сананан, үөһэ салҕанарга аналлаах олоппос оҥорон саҕалаатым. Киэһээҥҥэ диэри бүтэрэ сыһар инибин.
-
0
-
0
-
0
-
0
-
0
-
0
