Норуот дьокутааттара Ил Дархан ааспыт сыллааҕы үлэтин сүрүн эркээйилэрин өйөөтүлэр. Айсен Николаев отчуотун коронавируһу утары охсуһууттан саҕалаата. Хас куойка-миэстэ, обсерватор, анаалыс оҥоһуллубутун, эминэн хааччылыыга төһө үп-харчы көрүллүбүтүн сырдатта. Айсен Сергевич билигин “коронавируһу күргүөмнээх вакцинация эрэ тохтотуон сөп” диэн бэлиэтээтэ.
Хамсык кэмигэр бырамыысыланнас уонна олоҕу-дьаһаҕы хааччыйар тэрилтэлэр үлэлэрин тохтоппотохтор. Нэһилиэнньэҕэ үгүс социальнай өйөбүллэр оҥоһуллубуттар. 9,2 млрд. солк. суумалаах көмөнөн 160 тыһ. оҕолоох дьиэ кэргэн, 57,7 тыһ. үлэтэ суох киһи туһаммытын иһитиннэрдэ. Уопсайа экэниэмикэ бары салааларын өйөбүлүгэр 34 млрд. солк. көрүллүбүт. Онтон 23 млрд. солк. федеральнай хааһынаттан кэлбит.
Хамсык уустук кэмигэр АЛРОСА хампаанньа өрөспүүбүлүкэ хааһынатын 23 %-нын толорбут. Ол курдук, 138 млрд. солк. суумалаах дивидены төлөөбүт. Маны сэргэ Ил Дархан социальнай хайысха ситиһиилэрин сырдатта. 2020 сылга өрөспүүбүлүкэ 1763 элбэх оҕолоох ыал учаастактарын инженернай ситимнэргэ холбообут. Аны туран, Сунтаар уонна Ньурба хайысхатынан уоту күүһүрдүүгэ “Русгидро” ПАУо-ну кытта дуогабар түһэрсиллибит. “Газпром” ПАУо-ну кытта 2021-2025 сылларга Өлүөхүмэ, Ленскэй, Алдан уонна Нерюнгри нэһилиэктэригэр гаас утаҕын тардар туһунан бырагыраама оҥоһуллубут.
Былырыын “Колмар” хампаанньа саамай улахан “Инаглинская” диэн шахтата үлэҕэ киирбит. Өлүөнэ муостатын тутуута Уһук Илин сайдыытын Национальнай бырагырааматыгар киллэриллибит. Мииринэй улууһугар Аччыгый Ботуобуйа үрэҕи туоруур муоста, Ньурба улууһугар Түүкээн үрэҕи туоруур муоста, Сунтаар улууһугар Улахан Муҕур уонна Саһар Үрэх үрэхтэригэр муосталар тутуллубуттар. Уопсайа 534,9 км усталаах саҥа суоллар үлэҕэ киирбиттэр.
Бу курдук, Айсен Николаев социальнай-экэнэмиичэскэй сайдыы бары эйгэлэригэр ыытыллыбыт үлэни-хамнаһы билиһиннэрдэ.
-
0
-
0
-
0
-
0
-
0
-
0
