2023 сыл устата дьокутааттар олох бары эйгэтин хабар 694 сокуон барылларын бигэргэттилэр. Сорохторо хайыы-үйэ үлэлииллэр, оттон атыттара кэлин олоххо киириэхтэрэ. Бүгүн 2024 сылга олоххо киирэр Госдумаҕа бигэргэммит норуокка киэҥ кэпсэтии таһаарбыт тоҕус сокуон барылларын чинчийэн хомуйдубут.
Оскуолаҕа мобильнай төлөпүөн бобуллар
Бу күннэргэ дойду Бэрэсидьиэнэ Владимир Путин Госдумаҕа саҥа сокуон барылын бигэргэттэ уонна уруок кэмигэр үөрэнээччилэр мобильнай төлөпүөннэри туһаналларын бобор федеральнай сокуоҥҥа илии баттаата. Оскуолаҕа смартфоннары урукку курдук туһаныахха сөп эрээри, саҥа сокуон ирдэбилинэн учууталлар уонна оҕолор ыксаллаах быһыыга-майгыга эрэ туһаныахтарын сөп буолла. Итини таһынан сокуон үөрэҕирии эйгэтигэр өссө эбии кэккэ уларыйыылары киллэриэҕэ. Холобур, учууталлары атаҕастыыртан уонна кыһарыйыыттан көмүскүүр бырааптарын мэктиэлиир, оттон алын уонна орто кылаас үөрэнээччилэригэр үлэ уруогун киллэрэр. Бу сокуон сүрүн балаһыанньалара үксэ 2024 с. балаҕан ыйын 1 күнүттэн үлэлиэҕэ.
Оскуолаҕа черчение уруога төннүөҕэ
Аны кэлэр үөрэх сылыттан үөрэнээччилэри өссө биир уларыйыы күүтэр. Оскуолаҕа черчение уруога төннүөҕэ. Бу дьиҥэр Госдума быһаарыыта буолбатах, ити сыалга Владимир Путин бэйэтин туһааннаах сорудаҕын биэрбитэ. Ити курдук, черчениены орто кылаас үөрэнээччилэрэ баһылыахтара, онтон биридимиэти ордук сиһилии үрдүкү кылаас үөрэнээччилэригэр биэриэхтэрэ.
Төрөппүттэр үлэлииллэрин таһынан босуобуйа ананара көҥүллэннэ
Госдума ахсынньыга оҕо төрөөбүтүн кэннэ сыл аҥаара туоларын күүппэккэ үлэҕэ тахсыбыт төрөппүттэргэ босуобуйа төлөбүрүн оннунан хаалларыы туһунан сокуон барылын ылыммыта. Оҕо босуобуйатын төлөбүрүн суумата уоппусканы ким туһанарыттан уонна дохуотуттан тутулуктаах. Ити курдук, икки кэнники сыллааҕы орто хамнас 40%-на ааҕыллан төлөнүөҕэ.
Билигин сокуон хараҕынан төрөппүт үлэтигэр таҕыстаҕына, босуобуйа төлөбүрэ тохтотуллара. Кэлэр сыл тохсунньу 1 күнүттэн ийэ оҕолонон баран үлэтигэр таҕыстаҕына, босуобуйа син биир толору ананыаҕа.
ОДьКХ өҥөтүн төлөбүрүгэр комиссия ылар сатаммат
Бааннарынан ОДьКХ төлөбүрүн ыытарга аны комиссияны хомуйууну бобор сокуон барыла эмиэ бэрт соторутааҕыта тахсыбыта. Ол гынан баран ити быраабыла киһиэхэ барытыгар тарҕаммат. Комиссияны хомуйууну тохтотуу социальнай өйөбүлгэ наадыйар эрэ гражданнарга туһуланар. Кинилэр испииһэктэрин сотору кэминэн дойду бырабыыталыстыбата быһаарыаҕа. Санаттахха, бэрт соторутааҕыта Владимир Путин пресс-кэмпириэнсийэ кэмигэр баан комиссията биэнсийэлээхтэртэн хомуллубатын туһунан иһитиннэрбитэ. Бэрэсидьиэн номнуо докумуоҥҥа илии баттаата. Саҥа сокуон 2024 сыл от ыйын 1 күнүттэн күүһүгэр киириэҕэ.
Аармыйаҕа ыҥырыы — 30 саастарыгар диэри
Госдумаҕа 2023 сыл саҕаланыыта дьокутааттар байыаннай сулууспалаахтарга сыһыаннаах сокуону уларытарга күүскэ үлэлээбиттэрэ. Бу эйгэҕэ биир сүрүн уларыйыы – сулууспаҕа ыҥырар сааһы 27-тэн 30-гар диэри үрдэтии буолар. Саҥа быраабыла 2024 сыл тохсунньу 1 күнүттэн үлэлиэҕэ, ол эрээри быйыл 27 саастарын туолбут уолаттарга бу ирдэбил тарҕаммат. Госдума Оборуонаҕа кэмитиэтин бэрэссэдээтэлэ Андрей Картапов быһаарбытынан, 27 саастарын туолбуттары урукку быраабыланан сапааска көһөрүөхтэрэ. Сулууспаҕа ыҥырыы алын кээмэйин эмиэ 18-тан 21 сааһыгар диэри улаатыннарарга былааннаммыта эрээри, олус элбэх уол чопчу 18 сааһыгар сулууспалыан баҕаралларын биллэрбиттэринэн, урукку таһымынан уларыйбакка оннунан хаалла. Итини таһынан быйыл Госдума дьокутааттара бастакы хантараак түһэрсэр саас болдьоҕун эмиэ уларыттылар. Итини сэргэ аармыйаҕа ыҥырыы бэбиэскэтин Госуслуги портал нөҥүө ыытарга көҥүл олохтонно.
Нолуок вычета чэпчэтиллибит бэрээдэгинэн оҥоһуллуоҕа
Кэлэр сылтан нолуок сокуонугар уларыйыылар күүтүллэллэр. Тохсунньу 1 күнүттэн нолуок вычетыгар судургутутуу быраабылата киирэринэн, эмтээнии, үөрэх, успуордунан дьарыктаныы, баҕа өттүнэн пенсионнай уонна олоҕу страховкалааһын ороскуотун нолуок суотугар туһаныахха сөп буолуоҕа. Саҥа ирдэбилинэн нолуок уорганнарыгар туһааннаах иһитиннэриилэри үлэ биэрээччи уонна урбаан тэрилтэлэрэ быһаччы ыытар бырааптаныахтара. Ол курдук, декларацияны толорор уонна туһааннаах докумуоннары хомуйар ирдэммэт.
Барыһы таһынан дохуокка нолуок киирдэ
Өссө биир нолуокка уларыйыы – барыһы таһынан дохуокка нолуок олохтонно. Сокуон барылыгар бэрэсидьиэн илии баттаабыта уонна тохсунньу 1 күнүттэн күүһүгэр киириэҕэ. 2018-2019 сс. көрдөрүүлэринэн 2021 уонна 2022 сылларга барыһы таһынан дохуокка орто кээмэйин куоһарыы ааҕыллар. Оччотугар нолуок сылга биирдэ төлөнүөхтээх. Саҥа нолуок дойду хампаанньаларыгар уонна тас дойдулар тэрилтэлэр бэрэстэбиитэлистибэлэригэр сыһыаннаах. Дьоҕус уонна орто урбаан тэрилтэлэригэр бу ирдэбил тарҕаммат.
Кирэдьиит сынньалаҥа болдьоҕо суох буолла
Тохсунньу 1 күнүттэн кирэдьиит сынньалаҥын биэрии болдьоҕо суох буолар. Бу өйөбүлү аан бастаан пандемия саҕаланыыта киллэрбиттэрэ, онтон хаста да уһатыллан, дьэ, болдьоҕо суох оҥорорго быһаарылынна.
Кирэдьиит сынньалаҥын дохуот намтыыр кэмигэр сыл аҥаарыгар туһаныахха сөп, ол эрээри бу кэмҥэ кирэдьиит бырыһыана салгыы ааҕыллар уонна кирэдьиит историятыгар киирбэт.
Буруйдаахтарга олохторугар көмөлөһүөхтэрэ
Дойду үрдүнэн хаайыылаахтары босхолооһун кэнниттэн социумҥа кыайан киирбэттэригэр быйыл сокуон оҥорооччулар кириитикэлэммиттэрэ. Ити сыалга быйыл Госдума саҥа сокуон ылынна. Оччотугар хаайыыттан босхоломмут гражданнар социальнай адаптацияны ааһалларыгар көмөнөн туһаныахтара. Саҥа быраабыланан хас биирдии киһиэхэ өйөбүл бырагыраамата чопчу усулуобуйатыттан уонна лиичинэс характеристикатыттан көрөн оҥоһуллуоҕа. Сокуон сүрүн балаһыанньалара 2024 сыл тохсунньу 1 күнүгэр күүһүгэр киириэхтэрэ.
Госдума матырыйаалларынан
-
0
-
0
-
0
-
0
-
0
-
0
