Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин:
Айсен Сергеевич бүгүн уопсайа 26 хайысханан бэйэтин көрүүлэрин эттэ диэн мин бэлиэтэнним. Ол курдук, ковид, кураан, баһаар, анал байыаннай операция кэмигэр туох үлэни ыыппыппытын, тугу ситиспиппитин, ханнык хайысхалары сүтэрбэтэхпитин бэлиэтээн эттэ уонна бу хайысхаларга барытыгар туох үлэ ыытыллыахтааҕын тоһоҕолоото. Чуолаан эттэххэ, 5 сыллаах улахан былаан, инникини өтө көрүүлээх үлэ-хамнас туһунан эттэ.
Оттон тыа хаһаайыстыбатын этэр буоллахха, хас биирдии хайысхаҕа сокуон барылын бэлэмнииргэ биһиэхэ, Ил Түмэн дьокутааттарыгар, сорук туруорда. Сокуон бэйэ бородууксуйатын оҥорон таһаарар территориялары бэрээдэктиир ис хоһоонноох буолуоҕа. Сокуон барылын Ил Түмэн дьокутааттара уонна Саха Өрөрспүүбүлүкэтин Бырабыыталыстыбата бэлэмниэхтээхтэр. Онон билигин Сахабыт сирин Тыа хаһаайыстыбатын министиэристибэтэ аҥаардас судаарыстыбаннай бырагыраамаҕа көрүллүбүт үп иһинэн үлэлээбэккэ, олохтоох бородууксуйанан, аһылыгынан хааччыйыы штаба буолуохтааҕын Айсен Сергеевич күүскэ тоһоҕолоон эттэ.
Бу былаан туолуутугар СӨ Тыа хаһаайыстыбатын министиэристибэтин үлэтин хайысхатын кэҥэтии боппуруоһугар биһиги бары бырабыыталыстыбаны кытта бииргэ үлэлиэхпит дии саныыбын. Ол иһин Айсен Сергеевич 2023 сылы Үлэ сылынан биллэрдэ. Онон иннибитигэр ити хайысхаҕа үлэлииргэ-хамсыырга барыбытыгар улахан, киэҥ былааннар тураллар диэн сыаналыыбын.
Ил Түмэн ыччат дьыалаларыгар, физическэй култуураҕа уонна успуорка сис кэмитиэтин бэрэссэдээтэлэ Михаил Гуляев:
Быйыл бу уустук кэмҥэ Ил Дархан Туһаайыытыгар хайысха барыта хабыллан ситиһиилэр этиллибиттэрэ уонна сыал-сорук туруоруллубута дириҥ ис хоһоонноох буолла. Ил Дархан сылтан сыл уопутуран, салайар истиилэ ордук өрөспүүбүлүкэ сайдыытыгар хайысхаланан күүһүрэн иһэр. Буолбут ыарахаттары көрсүүттэн сылтаан сөптөөх дьаһаллар ылыллыбыттара, ону туоратыыга улахан үлэ-хамнас ыытыллыбыта.
2020-21 сыллаахха ковидка улаханнык соһуйбуппут. 2022 сылга омикрон диэн ковид саҥа барыйаана кэлбитигэр, бу штамм салгыы тарҕамматын туһугар 16 000 кэриҥэ киһи үлэлээбитэ.
Быйыл уһуннук кэтэспит аспаалбыт Аллараа Бэстээхтэн Чурапчыга тиийбититтэн улаханнык үөрэбит. Сүрдээх үчүгэй хаачыстыбалаахтык тутулунна диэн сыаналыыбын. Бу суол салгыы Магадаҥҥа дылы барара былааннанар.
Ону сэргэ бары уһуннук кэтэспит муостабыт 2023 сылга бырабыыталыстыба үбүлээһинигэр киирэр. Онон муоста тутуута саҕаланыа диэн улаханнык эрэнэбит.
Тыа хаһаайстыбатыгар бородууксуйа хаачыстыбатын тупсарыыга кэккэ этиилэр оҥоһулуннулар. Элбэх үп-ас бэриллэр гынан баран, бородуукта элбээбэт кыһалҕата баар. Ол элбээһинигэр улахан болҕомтону ууруохха диэн тыа хаһаайыстыбатын министиэристибэтигэр уонна бырабыыталыстыбаҕа сорук туруорулунна.
Бырамыысыланнаспыт төһө даҕаны уустугун, ыараханын иһин, сүрдээх үчүгэй ситиһиилэрдээх. Алмаас, ньиэп, гаас, чох өттүттэн элбэх нолуок киирдэ. Көмүс хостооһуна сылтан сыл улаатар. Онон бу уустук хайысха кэҥээтэр кэҥээн иһэр.
Кэлэр 2023 сыл Үлэ сылынан биллэрилиннэ. Онон уустуктары туоратыыга улаханнык түмсүөххэ, бары биир санаалаах буолуохха уонна өрөспүүбүлүкэбитин тупсарыыга күүскэ үлэлээн бары турунуохха диэн ыҥырабын.
-
0
-
0
-
0
-
0
-
0
-
0
