Ил Дархан Айсен Николаев ахсынньы 30 күнүгэр «Үйэ оҕолоро» Саха Өрөспүүбүлүкэтин тус сыаллаах хапытаалы тэрийэр уонна 2022 сыл ахсынньы 1 күнүттэн ахсынньы 31 күнүгэр диэри Саха сиригэр саҥа оҕо күн сирин көрдөҕүнэ, 100 тыһ. солк. сууманы аныыр туһунан Ыйаахха илии баттаата.
«Үйэ оҕолоро» тус сыаллаах хапытаалы тэрийии туһунан көҕүлээһини Ил Дархан Айсен Николаев парламеҥҥа туһаайан Анал этиитигэр иһитиннэрбитэ. Бырайыагы олоххо киллэрии Саха АССР тэриллибитэ үбүлүөйдээх 100 уонна Ийэ сылыгар ураты суолтаны биэриэҕэ.
Дьиэ кэргэҥҥэ анаммыт хапытаалы кирэдьиит тэрилтэлэригэр үлүннэриигэ уурунарга, оҕо үөрэҕэр, оҕоҕо үрдүк технологиялаах мэдэссинискэй көмөнү оҥорууга, социальнай реабилитациялааһыҥҥа, санаторнай-курортнай эмтээһиҥҥэ ыытарга, эмп атыылаһарга, дьиэ кэргэнинэн дойду үрдүнэн сынньана баралларыгар айан төлөбүрүн уйунарга, дьиэ-уот усулуобуйатын тупсарыыга, дьиэ өрөмүөнүгэр, кэтэх хаһаайыстыбаны сайыннарыыга, ону тэҥэ тыа хаһаайыстыбатын тиэхиньикэтин атыылаһыыга уонна оҕо доруобуйатын страховкалааһыҥҥа ыытыахтарын сөп.
СӨ Үлэҕэ уонна социальнай сайдыыга министиэристибэҕэ бэлиэтээбиттэринэн, бырайыак үрдүк социальнай суолталаах. Бырайыагы олоххо киллэрии судаарыстыбаннай дьиэ кэргэн уонна демографическай бэлиитикэ таһымын үрдэтиэҕэ уонна өрөспүүбүлүкэҕэ оҕо төрөөһүнүн өйөөһүҥҥэ көмөлүөҕэ.
Саха сиринээҕи статистика дааннайынан 2019 с. —12817 оҕо төрөөбүт, 2020 с. – 13097, 2021 с. тохсунньу-алтынньы ыйдарыгар — 10335 оҕо.
2022 сылга Саха сиригэр 12800-тэн тахса оҕо күн сирин көрөрө күүтүллэр.
"Үйэ оҕолоро“ Саха Өрөспүүбүлүкэтин тус сыаллаах хапытаалы тэрийии туһунан Саха сирин баһылыгын 2021 с. 30 күнүнээҕи 2258 №-дээх Ыйааҕын ордук сиһилии манна билсиэххэ сөп. Маны баттаа.
-
0
-
0
-
0
-
0
-
0
-
0
