Эрэгийиэннэр икки ардыларынааҕы сэминээр төрүт тыллары көмүскүүр сыаллаах ыытылларын Феодосия Габышева бэлиэтээтэ. Тэрийээччи -- РФ Үөрэҕин министиэристибэтэ, оттон мунньаҕы сүрүннээччинэн Дьиэ кэргэн сыаннастарын харыстыыр, социальнай өйөбүлү оҥорор төрөппүттэр национальнай ассоциациялара буолар.
Маннык сэминээрдэр 2020 с. от ыйыттан 2022 ахсынньытыгар диэри 3 сыл устата Арассыыйа бары федеральнай уокуруктарыгар ыытыллыахтара.
Сэминээрдэр сыаллара-соруктара -- РФ төрүт олохтоохторун тылларын өйүүр эрэгийиэннээҕи бэлиитикэ көдьүүһүн үрдэтии, төрөөбүт тылга уһуйуу бастыҥ уопутун тарҕатыы, үөрэтэр матырыйааллары, методическай босуобуйалары, учуобунньуктары саҥалыы киэптээн оҥорууга үлэлэһии.
Бу тэрээһиҥҥэ Арассыыйа наукаларын академиятын, үрдүк үөрэх кыһаларын тылы чинчийэр улахан учуонайдара, бастыҥ исписэлиистэрэ, РФ ситэриилээх былааһын уорганнарын бэрэстэбиитэллэрэ, уопсастыбаннай уонна научнай түмсүүлэр чилиэннэрэ, бөдөҥ педагогтар, преподавателлэр кыттыахтара.
Саха сириттэн эксперт быһыытынан Ил Түмэн үөрэххэ, наукаҕа, култуураҕа, көрдөрөр-иһитиннэрэр эйгэҕэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева, СӨ национальнай оскуолаларын научнай-чинчийэр институтун дириэктэрэ Светлана Семенова, СӨ аҕыйах ахсааннаах хотугу норуоттарын бырааптарын боломуочуйалааҕа Лена Иванова үлэлиэхтэрэ.
-
0
-
0
-
0
-
0
-
0
-
0
