Кулун тутар 8 күнүнэн - Аан дойду дьахталларын күнүнэн ситимнээн биһиги хаһыаппыт эрэдээксийэтэ норуот итэҕэллээхтэрин, улуустар Сэбиэттэрин дьокутаат-дьахталларын кытта билсиһэн, кинилэр хайдах дьокутаат буолбуттарын, таптал, дьол диэни хайдах өйдүүллэрин туһунан кэпсииллэригэр уонна сөбүлүүр астарын ырысыабын үллэстэллэригэр көрдөстүбүт.
Дьон итэҕэлэ – эппиэтинэс
Маргарита Гаврильевна Константинова, Горнай улууһун дьокутааттарын Сэбиэтин бэрэссэдээтэлэ, 3 ыҥырыыга дьокутаатынан талыллан үлэлээбитэ, улуус сайдыытыгар дьоһун кылаатын киллэрбит уопуттаах салайааччы:
– Оскуолаҕа үөрэнэр кэмнэрбэр төрөппүттэрим, тулалыыр дьонум дьоҥҥо туһаны оҥороллорун, дьону кытта бииргэ буолалларын үрдүктүк туталларын көрөн, кинилэр холобурдарын батыспытым, барыга барытыгар көхтөөхтөк кыттар актыбыыска этим. Хайа уонна учууталларым, оскуолам, пионер, хомсомуол иитиилэрин аастаҕым дии. Билигин дьокутаат буолан туран өйдүүбүн, ис дууһаттан дьонум -сэргэм туруктаах олохтоноллорун туһугар үтүө сабыдыаллаах буолбут киһи диэн баҕа санаалаах, ол туһугар үлэлиир-хамсыыр киһиэхэ дьон эрэнэр, итэҕэйэр, өйүүр. Оннук итэҕэли ылар олус үөрүүлээх уонна улахан эппиэтинэстээх.
Дьол уонна таптал орто дойдуга кэккэлэһэ иһэллэр. Төрөппүттэргин, доҕотторгун, кэргэҥҥин, оҕолоргун, үлэҕин, дьоҥҥун-сэргэҕин, төрөөбүт дойдугун, айылҕаны, олоҕу таптыыр буоллахха дьоллооххун. Уонна бары доруобай, дьоллоох, этэҥҥэ сылдьаллара - дьол.
Улахан асчыта суохпун, бириэмэ да суох курдук уонна маннык тута диэн эттэххэ арай... Дьиэ кэргэним бары тэллэйдиирбитин сөбүлүүбүт уонна сибиэһэйдии сүөгэйгэ буһаран астына сиибит.
Сүөгэйгэ буспут тэллэй
500 гр. сибиэһэй тэллэйи сууйан, 4 гына кырбыыбыт. Ыстакаан аҥаара ууллубут арыыны сылытан чеснок түөрт тииһин бытархай гына быһан кутабыт. Тууһун, биэрэһин эбэбит. Онтон тэллэйин таммалатан, кыра уокка чаас кэриҥэ буһарабыт. Духуопкаҕа аналлааах таас иһиккэ ыстакаан аҥаара сүөгэйи кытта буһарбыт тэллэйбитин булкуйабыт уонна үрдүгэр 50 гр. сыыры ууран, 20 мүнүүтэ духуопкаҕа 180 кыраадыска туруорабыт. Минньигэстик аһааҥ!
Алексей МАТВЕЕВ
Хаартыска М.Г. Константинова архыыбыттан
-
0
-
1
-
0
-
0
-
0
-
0
