Кини Дьокуускайтан көтөн кэлээт даҕаны улуустааҕы киин балыыһаҕа баран балыыһа салалтатын, быраастары кытары көрүстэ, итиэннэ бу күннэргэ харахтарыгар эпэрээссийэни ааспыт ыарыһахтары кытары кэпсэттэ, доруобуйаларын туругун туоһуласта диэн Бытантай уоттара хаһыат саайтыгар суруйар.

Эпэрээссийэ кэнниттэн палааталарыгар сытар ыарыһахтар киин куоракка айанныырга бырайыаска үгүөрү харчыны бараабакка миэстэтигэр анал быраастар биригээдэлэрэ кэлэн, эмтээн-томтоон барбыттарыгар барҕа махталларын тириэртилэр уонна бу хотугу улуус олохтоохторугар олус үчүгэй бырагыраама буоларын бэлиэтээтилэр.

Киин балыыһа кылаабынай бырааһа Георгий Бочкарев стационар уонна поликлиника дьиэтин көрдөрдө, сотору кэминэн поликлиникаҕа хапытаалынай өрөмүөн ыытыллыахтааҕын туһунан эттэ.

Балыыһаҕа көрсүһүүнү түмүктүүр чааска киин балыыһа кэлэктиибин аатыттан Иван Петровичка махтал суругу кытары эбээннии паннону уонна чубуку муоһуттан харысхалы бэлэхтээтилэр.

Иван Петрович бэлиэтииринэн, Сахабыт сирин араас улуустарыгар командировкаҕа сылдьар кэмигэр бириэмэ булан оҕолору, ыччаттары кытары булгуччу көрсө сатыыр. Ол үтүө үгэһинэн кини Саккырыыр орто оскуолатыгар, Оҕо саас киинигэр, «Хаарчаана” оҕо уһуйааныгар сылдьан кэнчээри ыччаты кытары кэпсэттэ.

Үрдүкү кылаас үөрэнээччилэрэ сүрүннээн киин куораппытыгар баар үөрэх кыһаларын туһунан ыйыттылар. Иван Петрович киһиэхэ саамай кылаабынайа баҕа санаа улахан оруолу оонньуурун эттэ уонна оҕолорго үөрэххэ туттарсар кэмнэригэр инники олохторун тымтыктанан көрөн, бэйэлэригэр сөптөөх идэни талалларыгар баҕарда. Кини бэлиэтииринэн, аны аҕыйах сылынан сорох идэлэри ИИ (искусственнай интеллект) солбуйан, үлэ миэстэтигэр улахан күрэстэһии буолуо. Уонна саамай кылаабынайа ханна да сырыттаргыт ийэ сиргитин, төрөөбүт дойдугутун умнумаҥ диэн алгыһын анаата.  

Ханнык баҕарар сиргэ тиийдэххэ култуура уонна түмэл – улуус олоҕун-дьаһаҕын сиэркилэтэ буоларынан, Иван Петрович «Гарпан” этгокултуурунай кииҥҥэ, чуолаан бибилэтиэкэҕэ уонна кыраайы үөрэтэр түмэлгэ ыалдьыттаата. Маны таһынан «Мария” маҕаһыыҥҥа сылдьан сыананы көрдө-иһиттэ. Сардаана Васильева

Хаартыскаҕа Семен Слепцов түһэриитэ