Бүгүҥҥү күҥҥэ тирээн турар кыһалҕалары билистилэр. Оробуочай бөлөх бастаан Балыктаах бөһүөлэгэр тутулла турар 150 миэстэлээх саҥа таас оскуола тутуутун көрдө. Эбийиэги Василий Пинигин салайар «Электромонтаж» ХЭТ бэдэрээттэһэн тутуу 75 %-на туолан, ахсынньы ыйга киирэргэ бэлэм. Билиҥҥитэ оскуола дизайн-бырайыагар боппуруостардаах. Оттон Төҥүлү бөһүөлэгэр 140 миэстэлээх уонна Аллараа Бэстээххэ 240 миэстэлээх оҕо уһуйааннара 2015-2016 сыллардаахха судаарыстыбаннай чааһынай партнерство бырайыагынан тутуулара саҕаламмыта. Онуоха эбийиэктэр бэдэрээтчиттэрэ үлэлэрин ситэри толорботохторун түмүгэр үгүс харгыстар үөскээбиттэрэ. Улуус быһылыга Николай Старостин иһитиннэрбитинэн, оҕо уһуйааннарын тутуутугар саҥа бэдэрээтчиттэри булан үлэ салҕанан ахсынньы ыйга түмүктэнэн, хамыыһыйаҕа туттарыллыахтаах. Оробуочай бөлөх Тумул бөһүөлэгэр сылдьан уруккута нэһилиэк дьаһалтата буолан турбут хонтуора дьиэтин баһылык Николай Сивцев 15 миэстэлээх успуорт хайысхатыгар аналлаах интэринээт оҥорбуттарын көрдөрдө. Интэринээккэ көҥүл тустуунан дьарыктанар оҕолор өрөспүүбүлүкэ араас улуустарын кэлэн үөрэнэн, дьарыктанан сайдыахтаахтар. Маны сэргэ тумуллар бэйэлэрин күүстэринэн успуорт саалатын өрөмүөннээбиттэр итиэннэ эбии кэккэлэһэ тустуу саалатын туппуттар. Улууска бу кэмҥэ үгүс баараҕай тутуулар үлэлэрэ бара турар. Ол курдук Аллараа Бэстээххэ бассейннаах успуорт комплекса, Майаҕа Д.Ф.Ходулов аатынан тыйаатыр, Аллараа Бэстээххэ уонна Майаҕа хаарбах туруктаах дьиэттэн дьону көһөрүү бырагырааманан уопсайа 200 кыбартыыра ахсынньы ыйга үлэҕэ киирэрэ былааннанар. Бассейннаах успуорт комплексын тутуута кыраапыктан хаалбакка иһэр. Уопсайа 104 ыстааттаах улахан эбийиэги Алексей Варламов салайыахтаах. Билигин эбийиэк үбүлээһинин, ититиитин, көрүүтүн-истиитин боппуруоһа экэниэмикэ уонна успуорт министиэристибэлэригэр үөрэтиллэ сылдьар. Тыа сирин улуустарыттан Мэҥэ Хаҥалас улууһа өрөспүүбүлүкэҕэ биир улахан кэскиллээх оройуонунан буолар. Чуолаан Аллараа Бэстээххэ тутуллар уонна тутуллуохтаах баараҕай эбийиэктэр бырайыактара улахан суолталаахтар. Онон бу тутулла турар эбийиэктэри кэмигэр үлэҕэ киллэрэр сорук Өрөспүүбүлүкэ Бырабыыталыстыбатын иннигэр турар диэн Ил Түмэн судаарыстыбаннай мунньаҕын бэрэссэдээтэлин бастакы солбуйаачыта Александр Жирков иһитиннэрдэ. Нэһилиэнньэ эбиллэ турарынан, инникитин эбии оскуолалар, оҕо саадтарын тутуулара наадалааҕын норуот дьокутааттара тоһоҕолоон бэлиэтээтилэр.
Зоя ГЕРАСИМОВА. /ulus.media/
-
0
-
0
-
0
-
0
-
0
-
0
