Дьокутаат көмөтө
«Биһиэхэ эмп атыылаһа кэлбит дьон бары норуот дьокутаата Сергей Ларионов аатыттан мааска уонна антисептик ылаллар. Атыылаһааччылар бу көмө кэмигэр уонна сөптөөх миэстэтигэр оҥоһулларын биһирээтилэр. Бүгүн биһиги нэһилиэнньэни маасканан хааччыйа сатыахтаахпыт. Сорох пакеттары волонтердарга биэриэхпит, кинилэр ону кырдьаҕас дьоҥҥо тиэрдиэхтэрэ», – диэн кэпсээтэ «Сэттэ нүөмэрдээх аптека» ХЭТ генеральнай директора Мария Артемьева (Амма улууһа).
Бу дьокутаат бастакы эрэ көмөтө буолбатах. Соторутааҕыта ити улуустарга обсерватордарга анаан утуйар таҥас комплектарын уонна элбэхтэ туттуллар мааскалары тигиигэ анаан миэтэрэнэн таҥастары аҕалбыттара, диэн «ЛОРП» ПАО иһитиннэрбитэ.
«Кризис кэмигэр көмөнү оҥорор, үтүө дьыаланы уонна сомоҕолоһууну өйүүр итиэннэ чопчу дьаһаллары ылынар туохтааҕар да суолталаах. Хомойуох иһин, бэйэни көмүскэнэр туһугар бастакынан наада буолар тээбириннэри сорох дьон ылар кыаҕа суох. Ол иһин мин икки оройуон нэһилиэнньэтигэр антисептиктары уонна мааскалары атыылаһар туһунан быһаарыы ылыммытым, – диэтэ Сергей Ларионов. – Амма уонна Уус-Маайа улуустарыгар баар нэһилиэктэр баһылыктарыттан, тэрилтэлэр салайааччыларыттан, олохтоохтортон сыстыганнаах ыарыы тарҕаныытын таһаарбат туһунан Роспотребнадзор бары бирикээстэрин, сүбэлэрин булгуччу толороллоругар көрдөһөбүн. Билигин бары бииргэ бу кризиһи этэҥҥэ аһарар туһугар хаһааҥҥытааҕар да түмсүүлээх буолууга, эрэлгэ наадыйабыт!».
-
0
-
0
-
0
-
0
-
0
-
0
