Издательский дом Редакция Подписка
Погода в Якутске: . -14 oC

Ойууһут, тимир ууһа, бөлүһүөк, Духуобунас академиятын чилиэнэ, П.А. Ойуунускай аатынан СӨ Судаарыстыбаннай бириэмийэтин лауреата Борис Федорович Неустроев-Мандар Уус «Куйаары улаҕатынан, сири сиксигинэн” альбом-кинигэтэ саха, нуучча, ангылычаан тылларынан 2020 сыллаахха тахсыбыта.

Ойууһут, тимир ууһа, бөлүһүөк, Духуобунас академиятын чилиэнэ, П.А. Ойуунускай аатынан СӨ Судаарыстыбаннай бириэмийэтин лауреата Борис Федорович Неустроев-Мандар Уус «Куйаары улаҕатынан, сири сиксигинэн” альбом-кинигэтэ саха, нуучча, ангылычаан тылларынан 2020 сыллаахха тахсыбыта.

Бу кинигэ тула кэпсэтиини Баайаҕа М.Н. Хатылаева аатынан модельнай бибилэтиэкэтин “Көмүлүөк күлүмэ” литературнай түмсүүтэ онлайн киэбинэн тэрийэн ыытта.

Маннык кинигэни оҥорор туһунан санааны доҕоругар Мандар Ууска Н.И. Егоров-Баайаҕыын укпут. Кинигэни нууччалыы В.С. Андросов, омуктуу А.В. Никифорова тылбаастаабыттар. «Төлөн» ААТ (сал. П.Д. Рахлеев)  үбүлээһинигэр көмөлөспүт.

 “Айыы тыла. Ойуу тыла” диэн киирии тылыгар Мандар Уус саха дьоно түҥ былыргыттан ойуу тылынан уонна айыы тылынан тэҥҥэ сайдан, Улуу Олоҥхону айан, тулалыыр эйгэтин ойуу нөҥүө көрөн, бэйэтин олоҕун-дьаһаҕын ойуулаан-бичийэн кэлбит омук буоларын туһунан суруйар. Билиҥҥи кэмҥэ саха омуга соҕотох айыы тылынан кэпсэтэр, өйдөһөр буолуута кэлтэй сайдыыны үөскэтэрин этэр. “Аныгы үөрэххэ оҕустаран, информацияны тутар, илдьэ сылдьар дьоҕурбутун сүтэрбиппит куһаҕан. Олоҥхоһут киһи өйдүүр-анаарар таһымыгар оҕолорбутун тиэрдэр туһугар кыһаллыы тирээтэ. Ыччаппытын иитэр, үөрэтэр, уһуйар үөрэхпитин, таһыммытын, “ойуу тыла”, “айыы тыла” диэн дириҥ өйдөбүллэри сүтэрэн эрэбит. Харах көрөрүн өйгө ойуулаан оҥорон көрүү – биһиги күүспүт, уратыбыт”, -- диир Мандар Уус.

Анаарыы альбом-кинигэ тула кэпсэтиигэ СӨ Ил Түмэнин Бэрэссэдээтэлин бастакы солбуйааччы Александр Николаевич Жирков кытынна.

--Уруулуу чугас омуктар эпостарыгар саха олоҥхотун курдук куйаарынан эҥсэр айымньы сүрдээх сэдэх. Саха олоҥхото саха оһоҕун үөлэһинэн тута өндөл маҥан халлааҥҥа тахсан, куйаар улаҕатынан эргийэр, оннук уратылаах айымньы. Билиҥҥи IT-технологиялар эйгэлэригэр куйаарга хотоойутук ситимнэһии олоҥхо баайдаах омук улаҕа өйүгэр, биһиги ыччаппыт кэтэҕэр, олорсо сылдьар. Саха ыччата глобальнай эйгэҕэ  түргэнник уһуйуллумтуо, түргэнник ылынар дьоҕурдаах. Онон саҥа технология үйэтигэр биһиги ыччаппыт кэскилэ улахан, ханнык да омукка сабырыйтарбат, үтүрүйтэрбэт дьоҕурдаах. Ону мүччү туппакка, кэмигэр уһуйуох, сайыннарыах кэриҥнээхпит, -- диэтэ бастакы вице-спикер.

Александр Николаевич оҕону кыра эрдэҕиттэн, улахан да дьону ити эйгэҕэ тардарга Мандар Уус кинигэтэ адьас кэмигэр тахсыбытын, кэмнэммэт улахан суолталаах үлэ буоларын бэлиэтээтэ. Манан сиэттэрэн, Александр Николаевич Мандар Уус үлэтин киэҥ эйгэҕэ, дьоҥҥо-сэргэҕэ тахсан, хайа сатанарынан сиһилии кэпсиэх, билиһиннэриэх, өйдөтүөх тустааҕын туһунан эттэ. Бу соругу толорорго ордук “Саха” НКИХ ханаала табыгастааҕын ыйан туран, Ил Түмэн вице-спикерэ этии киллэрдэ: «Мандар хас биирдии ойуутун тус бэйэтин кэпсэттэрэн, тэлэбиидэнньэнэн хас да түһүмэхтээх биэриини оҥоруохха баара. Киниттэн бэйэтиттэн ордук бу ойуулары быһаарар, кэпсиир ким да суох. Кэм баран иһэр, дьоҥҥо-сэргэҕэ бу улахан кэрэхсэбиллээх үөрэҕи билиһиннэрии таһынан, Мандар кэпсээнинэн документальнай цикл оҥоһуллуута -- саха култууратын хатыламмат көстүүтэ -- Мандар Уус айар кыаҕын биир өрүтүн кэлэр көлүөнэлэргэ тиэрдии суола буолуо этэ,”—диэтэ кини. Альбом-кинигэ тула куйаар ситиминэн тэриллибит кэпсэтиини үчүгэй тобулуунан аахта, салгыы салҕааһыннаах, түмүктээх буоларыгар баҕарда.

Бу күннэргэ бастакы вице-спикер «Саха» НКИХ салалтатыгар Мандар Уус  «Куйаары улаҕатынан, сири сиксигинэн” кинигэтинэн анал биэриилэр тиһиктэрин оҥорууга ылсарга этии киллэрэн, официальнай суругу ыытта.

Сергей Васильев,

Ил Түмэн пресс-сулууспата

 

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением