Нэһилиэк «Чурапчы» кэпэрэтиипкэ 423 туонна үүтү туттарар сорудаҕын толорорго бааһынай хаһаайыстыбалары таһынан, бэйэ дьарыктаах буолуутунан регистрацияламмыт кэтэх ыаллар үлэлииллэр.
– Бэс ыйыгар төрүт ардаабакка уонна аһыҥа туран, алаастарбыт кууран-хатан хааллылар, арай, Бабаҕабыт эрэ арыый курдук, – диир нэһилиэк дьаһалтатын баһылыга Людмила Ефремова (төһө да уоппускатыгар олордор, биһиги ыйытыыларбытыгар хоруйдаабытыгар махтанабыт). – Ол да буоллар, туох үүммүтүн оттоон ыларга соруктанан, дьоммут чааһынайдыын-бааһынайдыын ходуһаларга киирэн үлэлии-хамсыы сылдьаллар. Ыраах оттуур мобильнай биригээдэни билиҥҥитэ «Комплекс» бааһынай хаһаайыстыба тэринэр санаалаах, атыттар үрүйэ-харыйа сирдэри сирийэн, арыый өҥ сирдээх нэһилиэктэргэ баран, аймахтарыгар сыстан эбии оттуур баҕалаахтар. Дьиҥинэн саҥа оттоон эрдэхпит дии, баҕар, мантан сайын от арыый көбөөрөй диэн кыратык эрэнэ саныыллара ханна барыай?
Эрэллэрэ – Бабаҕа
«Комплекс» бааһынай хаһаайыстыба үлэ усулуобуйатын тупсарыыга, баазаны хаҥатыыга утумнаахтык үлэлиир. Ол курдук, бу сылларга Тыа хаһаайыстыбатын министиэристибэтин иһинэн көрүллэр «Бааһынай хаһаайыстыба баазатыгар дьиэ кэргэн пиэрмэтин тэринии» федеральнай бырагыраама чэрчитинэн сайылыгын саҥардарга үлэлиир. Былырыын титиик туттубута, быйыл атын тутууларын ситэрэр итиэннэ субан сүөһү турар кыстык хотонун өрөмүөннүүр. Хаһаайыстыба кураан сирдээҕин-уоттааҕын учуоттаан, сүөһү аһылыгын бааһынаттан хааччынарга дьулуһар. Сыл ахсын бааһынатын сирин кыралаан кэҥэтэн, быйыл бурдугу 100 гектарга, сиилэскэ анаан оту 140 гектарга ыспыт.
-- Оо, дьэ бурдуктан туһаммат буоллубут, – диир хаһаайыстыба салайааччыта Иван Парфенов. – Син тахсан иһэн, бэс ыйыгар халлаантан таммат уу түспэккэ, төрүт өнүйбэтэ, аһыҥа үөн алаастары бүтэрэн баран, аны бааһынаҕа киирдэ... Арай, ууну ыстарар тэриллээх, 20 гектардаах бааһынабыт үүнүүтэ син аҕай курдук да, киһи улаханнык саҥарбат, үрэхпит уута түһэн ахан эрэр. Оттон от чааһын ыллахха, чугастааҕы алаастарбытын тирбэҕэлэһэ сылдьабыт. Бу ходуһаларбытын бүтэрэ охсон баран, бөһүөлэктэн алта көстөөх Бабаҕа сиригэр барыахпыт. Эрэлбит ити Бабаҕа Эбэ этэ да, үрэх өттө эрэ арыый курдук, сыһыы өттө мөлтөх. Быһа барыллаан аахтахха, 200 туонна оту буларбыт дуу, суоҕа дуу? Мобильнай биригээдэнэн тиийэн оттоору, ыраах биир сири баран көрөн кэллибит.
-
0
-
0
-
0
-
0
-
0
-
0
