От ыйын 22 күнүнээҕи туругунан, 179 106 таба баар, былырыын баччаларга 178 686 этэ. Бу иһигэр Усуйаана улууһа 33 тыһыынча, Анаабыр 25 тыһыынча, Аллараа Халыма 15 тыһыынча, Булун уонна Эбээн Бытантай 14-түү тыһыынча, Муома 13 тыһыынча табалаахтар. Быйыл 39 997 тугут ылыллан, төрүөх көрдөрүүтэ 53,1 %-ҥа тэҥнэстэ. Билигин хаһаайыстыбалар ыстаадалара табаларын сайыҥҥы маршруттарынан мэччитэллэр.
– 2018 сылтан табаны иитиини өйөөһүн кэккэ боломуочуйалара улуустарга бэриллибитэ. Табаһыттарга көрүллэр харчыны кинилэр биэрэллэр. Онуоха төлөбүр кээмэйэ тохсунньу 1 күнүнээҕи туругунан хаһаайыстыба төһө табалааҕынан, ханнык зонаҕа сыһыарыллыбытынан көрөн ааҕыллар.
Табаны иитии биһиэхэ түөрт зонаҕа араарыллар: туундара (ыстаапка биир табаҕа 4 995 солк.), ойуур былаастаах туундара (5 545), хайа-тайҕа (6 694) уонна тайҕа зоната (8 242). Ити курдук, табаны иитии бэйэҕэ турар сыаната айылҕа уратытынан тутулуктанар. Быйылгы сылга көрүллүбүт үп барыта улуустарга ыытыллан, тустаахтага тиэрдиллэн турар, – диир тыа хаһаайыстыбатын миниистирин солбуйааччы Прокопий Николаев.
Маны таһынан, «Саха Өрөспүүбүлүкэтигэр 2020-2024 сс. тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун уонна ас-үөл ырыынагын сүрүннээһин» судаарыстыбаннай бырыгыраама чэрчитинэн, 10 тыһыынчаттан элбэх табалаах бөдөҥ хаһаайыстыбаларга табаны өлөрөн астыыр уонна тута тоҥорор тэриллэри, радиостанциялары атыылаһыы ороскуота толуйуллар.
- 1
- 0
- 0
- 0
- 0
- 0