Атыы-эргиэн эйгэтэ СӨ социальнай-экэнэмиичэскэй сайдыытыгар ураты кылааты киллэрэр. Ол курдук, үгүс урбаанньыттар биисинэстэрин бу хайысхаттан саҕалыыллар. СӨ Урбааҥҥа, атыыга-эргиэҥҥэ уонна туризмҥа министиэристибэтэ иһитиннэрбитинэн, бэлиэ күнү бэлиэтиир тэрээһиннэр, уустук эпидемиологическай балаһыанньанан, видео-сибээс көрүҥүнэн онлайн ыытыллыахтара. Бырааһынньыктааҕы тэрээһиннэр от ыйын 20 күнүттэн саҕаламмыттара.
«Атыы-эргиэн уонна уопсастыбаннай ас-үөл ырыынагын үлэһиттэрин идэлээх бырааһынньыктарын эҕэрдэлээн туран, биһиги эһигинэн киэн туттабыт диэн этэбит. Номнуо иккис сылын хааччахтааһын эрэсиимигэр олоробут. Бу бириэмэ эргиэн үлэһиттэриттэн ордук болҕомтолоох буолары ирдиир. Тэрилтэлэр күн ахсын саҥаттан саҥа кыһалҕалары, араас бобуулары, ирдэбиллэри көрсөллөр. Ол эрээри, саха биисинэһэ онтон харгыстаммакка, тэтимнээхтик сайдар уонна ханнык баҕарар балаһыанньаҕа улгумнук уларыйар кыахтааҕын дакаастаата», -- диэн бэлиэтиир биэдэмистибэ миниистирэ Ирина Высоких.
Өрөспүүбүлүкэ урбаанньыттарын биир уопсай мэтириэттэрин ойуулаатахха:
- Саха атыыһытын уобараһа - мындыр өйдөөх, көнө сүрүннээх, тобуллаҕас толкуйдаах, норуотун туһугар кыһамньылаах;
- Ортотунан үлэлээбит ыстааһа - 5 сыл кэриҥэ атыы-эргиэн эйгэтигэр үлэлиир;
- Сааһа - орто саастаах эр киһи (43,7);
- Тохсунньу 1 күнүнээҕи дааннайынан - урбаанньыттар ахсааннара 31573 киһи, иннинээҕи сылга тэҥнээтэххэ, 11,4%-нан намыһах.
Урбаанньыттар ТОП-5 үлэҕэ-хамнаска ордук тэнийбит көрүҥнэрэ:
- кууһунан уонна биирдилээн атыы-эргиэн, массыына уонна матасыыкыл өрөмүөнэ – 28,9%;
- таһаҕас тиэйиитэ уонна харайыы – 16,0%;
- тыа хаһаайыстыбата, ойуур хаһаайыстыбата, бултааһын, балыктааһын уонна балык иитиитэ – 11,1%;
- тутуу – 10,7%;
- оҥорон таһаарыы – 6,8%.
Атыы-эргиэн эйгэтин үлэһиттэрин идэлээх бырааһынньыктарынан «Ил Түмэн» парламент хаһыата итиитик-истиҥник эҕэрдэлиир.
Саха сиригэр атыы-эргиэн, чуолаан дьоҕус уонна орто урбаан, кэлиҥҥи кэмҥэ тэтимнээхтик сайдар. Урбаанньыттарбыт аһы-үөлү атыылыыр, араас өҥөнү оҥорор саҥа салааларга ылсан үлэлииллэрэ, тэнийэн иһэллэрэ үөрдэр. Онно, биллэн турар, атыылаһааччы наадатын туйгуннук толорор, үрдүк култууралаах атыыһыт өҥөтө улахан. Коронавируһу кытта бохсор үлэҕэ дьону-сэргэни табаарынан хааччыйыыга тэйиччиттэн атыы-эргиэн үтүө түмүктээҕэ көһүннэ. Онон аныгы технологиялары туһанан, олохпут саҥа ирдэбиллэрин кытта тэҥҥэ хаамсан, өрөспүүбүлүкэ социальнай-экэнэмиичэскэй олоҕор, урбаан сайдыытыгар сүҥкэн кылааккытын киллэрэҕит. Үлэҕит-хамнаскыт өссө таһаарыылаах буоларыгар, ситиһиилэри уонна чэгиэн-чэбдик доруобуйаны, этэҥҥэ буолууну баҕарабыт!
-
0
-
0
-
0
-
0
-
0
-
0
