Билиҥҥи туругунан араас салааларга кислороду оҥорон таһаарыыга «Кислород Якутии», «Витор» ХЭТ-лэр, «ЛОРП» ПАУо, «Сахаагроплем» СБТ уо.д.а. үлэлииллэр. Оттон медицинаҕа туһаныллар убаҕас кислороду оҥорууга Нерюнгритааҕы «Кислород Якутии» ХЭТ лицензиялаах. Бу тэрилтэттэн бастакы 8 туонна кислород Дьокуускайга ааспыт нэдиэлэҕэ аҕалыллыбыта. Билигин киин куоракка бу ХЭТ салаатын тэрийэр үлэ ыытыллар. «Сахаагроплем» судаарыстыба бүддьүөтүн тэрилтэтэ Арассыыйа Федерациятын Бырамыысаланнаһын министиэристибэтигэр сайаапкатын түһэрдэ, онон Росздравнадзорга регистрацияланыахтаах. Ити курдук бэйэни хааччыныы миэстэҕэ толору тэриллиэр диэри, кислород Хабаровскайтан аҕалыллар. Муус туруор диэри кислороду аҕалыыга харгыс суох буоларын хааччыйарга, Дьокуускайга кислороду туттууга, аҕалыыга итиэннэ харайыыга суукканан график-былаан оҥоһулунна.
Үс биэдэмистибэ, Доруобуйа харыстабылын, Тырааныспар уонна суол хаһаайыстыбатын итиэннэ Бырамыысаланнас уонна геология министиэристибэлэрэ, күннэтэ кыраапык мониторинын оҥороллор. Тырааныспар уонна суол хаһаайыстыбатын министиэристибэтэ улуустар дьаһалталарын кытары кислороду Дьокуускайга аҕалар массыыналары арыаллааһыны тэрийэллэр. От ыйыгар өрөспүүбүлүкэ саппаас пуондатыттан кислород наадалаах кээмэйин хааччыйыыга үп көрүллүбүтэ. Ил Дархан Айсен Николаев дьаһалынан, эмп тэрилтэлэригэр кислороднай станциялар тэриллиэхтэрэ. Бу туһунан Доруобуйа харыстабылын министиэристибэтин пресс-сулууспата иһитиннэрэр.
-
0
-
0
-
0
-
0
-
0
-
0
