Мэҥэдьэк нэhилиэгин Хатыы сэлиэнньэтиттэн 30-ча км тэйиччи Күскэндэ диэн сиргэ «Основа» ХЭТ тэрилтэ (ген. дириэктэр Федор Арчахов) үлэлээн эрэр. Ааспыт нэдиэлэҕэ итиннэ улуус баһылыгын солбуйааччыта Василий Семенов тиийэн, үлэ хайдах саҕаланан эрэрин билистэ. Ол туhунан улуус дьаhалтатын пресс-сулуспата иhитиннэрэр.
«Тутууга туһаныллар тааһы - базальты хостоон туһаҕа таһаарарга лицензиятын тэрилтэ былырыын ылбыт, - диир Василий Николаевич. – Ити сирдэрин “Куст-1” диэн ааттаабыттар. Көҥүллүүр докумуоннара толору баар. Кулун тутар 4 күнүгэр дэлби тэптэрэн, боруодатын өрө тэптэрэн таһаардылар. Үчүгэйэ диэн, өрүстэн чугас, 500-чэ миэтирэ кэриҥнээх сиргэ баар. Онон таһарга улахан эрэйэ суох буолсу. Суол сабыллыар диэри Кировка таһыахтаахтар. Кировтааҕы чох разреһыгар дробилкалаахтар. Базальты онно бытарытан араас фракциялаах хайыр таас (щебенка) оҥорон таһаарыахтаахтар. Ити матырыйаал суол оҥоруутугар уонна таас эбийиэктэри тутарга туһаныллар. Бүлүү бөлөх улуустарыгар тутуу тэрилтэлэригэр батарарга былаанныыллар”.
Урут Додоруку диэн сиргэ кылгас кэмҥэ эмиэ базальт хостоно сылдьыбытын билэбит. Базальт тутууга улахан наадалаах матырыйаал. Онон олохтоох матырыйаал тутуу үлэтигэр туһаныллан бардаҕына, тутуу сыаната даҕаны арыый чэпчиэн сөп.
-
0
-
0
-
0
-
0
-
0
-
1
