Сүрүн кэрэ көстүүтүнэн Бүлүү өрүс буолар. Ол курдук, искибиэр ортотугар араас өҥнөөх тротуар билиитэлэрэ ууруллуохтара, оттон өрүс үрдүгэр кумахтаах уонна мас ойуулаах тротуар билиитэлээх оҕо оонньуур зоната аһыллара былааннанар. Успуорт зонатыгар аспаал памп-трект баар буолуоҕа. Манна оҕолор хатааһылыахтара, оттон оскуола иннинээҕи саастаах оҕолорго салгыы оҕо былаһаакката тутуллуоҕа. Кэккэлэһэ күлүк сиргэ сынньанар, төрөппүттэр оҕолорун көрөр-истэр хачыаллаах икки навес туруоруллуоөа. Маны таһынан, бырайыак быһыытынан, кофейня, маҕаһыыннар эбэтэр сувенир атыылыыр анал миэстэлэр баар буолуохтара.
Искибиэр бэйэтэ фирменнэй истииллээх. Логотип уонна бренд саха сылгытын уобараһынан, Кирилл Никифоров «Хабытта Бэргэн» уонна Петр Тобуруокап «Лыах» айымньыларынан бигэргэннэ. Ааптардар этэллэринэн, талыллыбыт өҥнөрө тулалыыр эйгэни кытта дьүөрэлэһэллэр.
Эбийиэк сүрүн киэргэлинэн, үөһээ бүлүүлэр киэн туттар Исиидэр Бараахапка анаан боруонса пааматынньык буолуоҕа. Кини ХХ үйэ саҕаланыытын судаарыстыбаннай, уопсастыбаннай-бэлитиичэскэй диэйэтэлэ, Махсыым Аммосовы уонна Былатыан Ойуунускайы кытта гражданскай сэрии кыттыылааҕа, Саха АССР төрүттэниитигэр үлэлэспитэ.
Пааматынньык идиэйэтин төрүттээччи Үөһээ Бүлүү улууһун баһылыга Владимир Поскачин буолар. Кини этэринэн, биир киһи - лиичинэс эрэ, оттон устуоруйаны хамаанда оҥорор. Бу устуоруйа идиэйэтэ – саха норуотун 20-с сыллардааҕы «кыһылларыттан» быыһааһын, ол онно Исиидэр Бараахап уонна кини доҕотторо Иван Строд уонна Сергей Широких- олянскай эйэ дуогабарын түһэрсэн, утарсыыны халыбыратар кыахтаахтара.
Манна даҕатан эттэххэ, кэнники алта сыл устата Үөһээ Бүлүүгэ Исиидэр Бараахапка анаммыт 7 уопсастыбаннай миэстэ тутуллубута, оттон барытын ситимниир, киин тиһигинэн Исиидэр Бараахап аатынан искибиэр буолуоҕа.
Санаттахха, быйыл Уһук Илин уокурук субъектарын ортолоругар табыгастаах куорат эйгэтин тэрийэр бастыҥ бырайыактарын Бүтүн Арассыыйатааҕы куонкуруһун түмүгүнэн, Саха Сирин биэс бырайыага 300 мөл. солк. ылары ситиспитэ. Ол иһигэр Ленскайга Орджоникидзе аатынан уулуссаҕа тротуар зоната, Бороҕоҥҥо Мүрү күөлүн аттыгар набережнай, Жатайга В.П. Шамшин аатынан бульвар, Бэрдьигэстээххэ Кыайыы болуоссата уонна Үөһээ Бүлүүгэ И.Н. Бараахап аатынан искибиэр.
-
0
-
0
-
0
-
0
-
0
-
0
