Уу син түһэр курдук эбит эрээри, ылбыт сирэ-уота киэҥэ-куоҥа бэрт буолан, улаханнык биллэрбэт. Онон билигин дьоннор өтөхтөрү, үрдүк сирдэри сирийэн оттоон эрэллэр. Мелиорация управлениетыттан кэлбит экскаватор Эбэттэн Бэрэҕэ түһэр хорууну ыраастыы сылдьар. Ону бүтэрдэҕинэ, Нымсах ситимигэр барыахтаах, ол эргин элбэх хаһаайыстыба оттуур.
Афанасий Харлампьев салайар «Тускул» бааһынай хаһаайыстыбата кыралыын-улаханныын 200 ынах сүөһүлээх, ол иһигэр 70 ыанар ынахтаах, күҥҥэ 600 киилэ үүтү ыан астыыр хаһаайыстыбаҕа 400 туонна от наада.
– Пахай, мин ходуһаларым маһын саҕатыттан киһи киирэр кыаҕа суох ууга сыталлар, – диир Афанасий Кузьмич. – Уолум Кузьма Дьокуускай куорат таһынааҕы арыыга киирэн оттоон эрэр. Ол эмиэ уулаах буолан, үрдүк сириттэн саҕалаан охсо сылдьар. Билиҥҥитэ 150 рулуоннаах, ону туоннатыгар таһаардахха, 50 туонна диэххэ сөп. Тулагы туһаайыытынан турар Өлүөнэ өрүс арыытыгар Билир уонна Бэстээх диэн сирдэри сыһыартаран оттообуппут хаһыс да сыла буолла. Сайын аайы 300-чэкэ туоннаны ылааччыбыт. Быйыл ити арыыбытын эрэнэбит. Төһө кэлэринэн оттоон, поруому кэпсэтэн өрүһү туоратан, күһүҥҥүттэн оппутун тиэйдэхпитинэ эрэ табыллабыт. Ону даҕаны кыайтардаҕына, тоҕо диэтэххэ, Эбэ уута хаһан кэлэрин-барарын киһи төрүт да билбэккэ хаалар эбит, онон улаханнык саҥарыллыбат.
Лөкөчөөннөөҕү сирим өтөрүнэн ууттан босхолонор кыаҕа суох эбит диэн, Афанасий Кузьмич күнү-дьылы өрүсүһэн, уолугар Кузьмаҕа көмөлөһө тиийэргэ быһаарынна.
-
3
-
0
-
0
-
0
-
0
-
0
